AEKn euskara ikasteko izen ematea hilaren 25era arte, zabalik
Bidasoko AEK-k 2026-2027 ikasturterako eskaintza aurkeztu du; euskara ikasteko ohiko ikastaroez gain, hika-mintza taldea sortu dute berritasun gisa.
Bidasoko AEKn izena emateko epea zabalik dago, eta hilaren 25era arte zabaldu dute. Aurten ere, euskaltegiko aurrez aurreko ikastaroetan autoikaskuntzako ohiko ikastaroak eta ikastaro bereziak martxan jarriko dituzte; hain zuzen, mintza eta hika taldeak. Mintza taldea, izenak azaltzen duen bezala, soilik ahozko komunikazioa lantzeko taldea izango da; hika taldeak, berriz, hitanoa landuko du. Aurtengo berritasuna, hika-mintza taldea izango da. Astean behin, 90 minutuko saio bat izango dute hitanoa praktikan jartzeko eta hobetzeko.
Urtero legez, aurrez aurreko ikastaroetan aukera anitzak izango dituzte ordutegietan: goizez, arratsaldez eta gauez. Euskara hobeto edo titulua nahi dutenentzat, berriz, B2, C1 eta C2 mailetako ikastaro konbinatuak eskainiko ditu euskaltegiak. Autoikaskuntzako programa ere urritik ekainera izango da, eta bakoitzak bere erritmoan ikasteko aukera izango du. Gainera, asteroko mintza saioaz eta etxeko lanez gain, tutorearekin astean bitan biltzeko aukera izango du.
Ikasturte honetan, hasiberriek 120 euroko bonua izango dute eskuragai. Horren bitartez, A1, A2 eta B1 mailetako ikastaroak egiteko aukera izango dute. Zehazki, A1 egiten dutenentzat datozen bi ikasturteak doakoak izango dira; eta A2 egiten dutenek datorren urtean ez dute ezer ordaindu beharko.
Bestalde, BDSKOOPekin elkarlanean, Herritarron beka martxan jarri du Bidasoko AEK-k. Honela, matrikula ordaintzeko zailtasunak dutenentzat A1, A2 eta B1eko matrikula doakoak izango dira.
