Alardearen elkarrizketetan "zuhurtziaz jokatzeko adostasuna hautsi izana" leporatu dio EAJk udal gobernuari
Eragile ezberdinen arteko elkarrizketetan gertatutakoaren "funtsezko zati bat ezkutatu" dutela salatu dute jeltzaleek. HAOSE "publikoki seinalatzea" leporatu diote.
Atzo Hondarribiko udal gobernuak Alardearen inguruan argitaratuako oharraren harira, EAJ taldeak “kezka” agertu du, zalantzan jarriz “Abotsanitzek eta EH Bilduk bereziki sentikorra den egoera hau publiko egiteko aukeratutako unea eta kontakizuna”.
Eragile ezberdinen arteko elkarrizketetan gertatutakoaren “funtsezko zati bat ezkutatu” dutela salatu dute jeltzaleek, honakoa argudiatuz: “Udalaren oharrak elkarrizketa prozesuko eragileetako batek prozesua uztearen berri ematen du, baina ez du azaltzen erabaki hori hartzera eraman zuten arrazoiak zeintzuk izan ziren”. Hondarribiko Alardearen Ondarea Sustatzeko Elkarteak (HAOSE) hartu zuen uzteko erabakia. Haustura hori ulertzeko “funtzezkoa den elementua ezkutatzea” leporatu diote udal gobernuari: Elkarrizketa bide horietan “aurrerapausoak” izan zirela diote jeltzaleek, “prozesuaren dinamizatzailearen beraren arabera, parte hartzaileen bilakera positiboa eta konpromisoa sumatu baitziren” haien ustez.
Jeltzaleentzat “zaila da ulertzea zergatik erabaki duen udal gobernuak orain publiko egitea, bere oharrean bertan aitortzen duen bezala, duela hilabete batzuk gertatu zen egoera bat”. HAOSEk prozesua uzteko erabakia orain, eta bereziki, jaien atarian jakinaraztea leporatu diote udal gobernuari, “jaien bezperetara art itxaron du egoera hau publiko egiteko eta inplikatutako eragileetako bat horren modu zuzenean seinalatzeko”. “Erabaki horren berri duela hilabete batzuk bazuten, zergatik egiten da orain publiko? Zergatik, hain zuzen ere, jaien bezperetan? Zer bilatzen du udal gobernuak seinalamendu publiko honekin?”, galdu dute taldetik. Ekaineko bozeramaileen batzordean “egoera bereziki sentikor baten aurrean zuhurtziaz jokatzeko beharra agerian geratu zela” diote taldetik, eta horregatik galdera horiek “are beharrezkoagoak” direla orain. “Zer aldatu da ordutik? Elkarrizketa eta konfiantza berreskuratzen laguntzen al du inplikatutako eragileetako bat publiko seinalatzeak?”, erantsi dute.
Bukatzeko, taldetik adierazi dute “zilegi” dela “galdetzea ea komunikazio honen helburua benetan konfiantza berreskuratzeko beharrezko baldintzak sortzen den, edo udal gobernuak bere burua elkarrizketaren alde ahaleginak egin dituen eragile gisa aurkezteko eta porrotaren erantzukizuna besteengan jartzeko kontakizun bat eraikitzeko beharrari erantzuten dion”.
Jeltzaleek gogorarzi dute Alardearen inguruko bizikidetza honbetzeko lana “ez zela egungo udal gobernuarekin hasi”. Urte luzez elkarrizketa eta topaketarako guneak sustatu dituztela esan dute, “Hondarribian dauden sentsibilitate ezberdinekiko errespetuan aurrera egiteko helburuarekin”.
