Etxeko bandera beti da gozoagoa
Denboraldiko seigarren banderra lortu dute neskek, hau, etxean. Bigarren luzean 10 segundoko abantaila atera zioten Zarautzi, Euskotren ligako play off-etako postua gutxinaka bermatuz.
Etxean bandera irabazi dute neskek. Larunbatean lehenengo postua lortu zuten, eta seguru aski, asteburu guztian zehar izan dute irribarrea aurpegian. Euskotren ligako play offa oso gertu dute, eta soilik hiru estropada falta dira. Zarautz bigarrena izan zen, ohikoa izan den moduan, bietako batek irabaztean bestea bigarrena izaten da eta. Gailentasun handiarekin irabazi zuten, 10 segundoko abantailarekin.
Hasieratik gogor hasi zen Ama Guadalupekoa. Lehenengo luzean Zarautzekin batera aritu zen, berdezkoak bigarren kalean eta urdinezkoak lehenengoan. 5:30eko denbora markatu zuen Hondarribiak ziabogan, eta Zarautzek 5:31. Baina bigarren luzean, herria haiekin zutela, indartsu aurreratu ziren, eta 10 segundoko tartea jarri zuten erdian. Bigarren luzeetan erakutsi izan dute Osertz Aldayen neskek haien balioa, hainbat regata horrela amaituz, Zarautz azken metroetan garaituz. Asteburu honetan Castron izango dira.
KAE1 ligan, aldiz, Hondarribiko traineruak ez zuen horrelako zorterik izan. Hirugarren kaletik abiatu ziren Gonzalo Carrionek zuzendutako mutilak, eta lehenengo ziabogan San Pedrotik lau segundora izan ziren. Hurrengo ziabogetan tartea handitzen joan zen, eta azkenean, bigarren txandako hirugarrenak izan ziren, San Pedrotik zazpi segundora. Atzo ere lehian izan ziren, Errenterian, eta Hibaikak kolpea jo zion, Ama Guadalupekoaren aurretik jarriz. Asteburuko bi estropadetan zazpigarrenak izan dira hondarribiarrak. Sailkapen orokorrean, aldiz, Hondarribiak bigarren txandari eusten dio, Hibaika 4 puntotara duelarik. Asteburu honetan Castron izango dira.
