Ia ia egun amestua izan dute hondarribiarrek
Bigarrena izan da Ama Guadalupekoa gaur Hondarribian izan den estropadan. Lehia bizia izan du Oriorekin, baina azkenean haiek irabazi dute
Nahi izan dute, eta gertu izan dute, baina azkenean, ezer. Oriok irabazi du Hondarribiko Euskolabel ligako jardunaldia, eta Ama Guadalupekoa bigarrena izan da. Erakustaldi handia egin du etxeko traineruak, eta azken momentura arte eutsi diote oriotarrei, baina azken luzean Oriok erakutsi du zergatik den ligako lehena. Giro ederra bildu da espigoiaren inguruan, ohikoa izan den moduan, berdezko kamiseta askorekin.
Goizean goiz hasi da Arraun Festa, dultzainen soinuarekin. Herritik ibili dira Jostallu elkarteko dultzaineroak, herritarrak esnatuz. Ondoren, atzo bezala, Abiyuan txarangak hartu du lekukoa, eta Alde Zaharrean hasita, hondartzaraino eraman dituzte zaleak. Sentimendu bereziarekin jo dute musikariek gaur, haien taldeari animo guztiak transmititzeko asmoz. Pixkanaka espigoia betetzen joan da, eta bakoitzak bere txokoa, bere harria hartu du.
Euskotren ligan, berriro ere, Arraun Lagunak taldeak irabazi du, aurreko estropada guztiak bezala. Haizea protagonista izan da gaurko estropadan, eta arraunlariek ederki nabaritu dute. Mutilen txandan, Hondarribiak estropada ikaragarria egin du bigarren txandan, autoritate handiarekin, etxeko bandera altxatzeko ametsa ia egi bihurtuz. Oriok ohorezko txandan egin du bere estropada, eta hirugarren ziabogara arte, ezberdintasun oso txikia zuen Ama Guadalupekoarekin, segundo batekoa. Baina azken luzean Oriok gogor jo du, eta azkenean ia 10 segundoko abantaila atera dio Hondarribiari.
Eguna ez da amaitu
Askok espigoian ikusi duten arren, beste hainbatek hondartza alboan jarri duten pantaila erraldoia aukeratu dute. Giro ederra sortu da talde ezberdinen zaletuen artean, estropada denon artean ikusten zuten bitartean. Ondoan, hegaluzea parrillan jateko aukera izan da, eta usain hori estropada eremu guztitik zabaldu da pixkanaka pixkanaka. Egun handia dute hondarribiarrek gaurkoa, eta oraindik, ezin dute amaitutzat eman. Abiyuan txarangak Portua auzoan jo du bukatzerakoan, eta ondoren Burrunba elektrotxarangaren txanda izan da. Oraindik, gaua erori arte badute zer egin, San Pedro kalean hainbat kontzertu izango dira eta.
Hona hemen gaur HITZAk ateratako argazkiak:
