Lau bandera, lau lehia ezberdin
Asteburuan lau estropada izango dira Hondarribian. Larunbatean, KAE1 eta ETE ligak, eta igandean Euskotren eta Euskolabel.
Iritsi dira estropadak Hondarribira. Lau bandera izango dira jokoan asteburuan, bi larunbatean eta bi igandean. Egun handiak dira herriarentzat, eta asteburu osoan kaleak kolore ezberdinez beteko dira, arraun elkarte guztien zaletuei esker. Larunbatean KAE1 eta ETE ligak jokatuko dira, eta lehenengo mailak, hau da, Euskolabel eta Euskotren ligak igandean izango dira. Horrez gain, Hondarribiko Arraun Elkartearen eta Hondarribiko Udalaren eskutik, hainbat ekitaldi kultural izango dira, herria girotzeko xedearekin.
ETE Ligan, banderaren bila
ETE Ligako bandera izan daiteke errazena Hondarribia Arraun Elkarteko traineruentzat. Emakumeak lehenengoak dira ligan, baina arerio handia dute alboan: Zarautz. Azken hiru estropadetan ez dute lehen postua lortu, baina jada bost bandera dituzte aurtengo denboraldian. Sailkapen orokorreko lehen postuari eusten diote, Euskotren ligako play offa jada gertu dutela. Lau estropada gelditzen zaizkie aurretik, eta ondoren, Kontxako banderaren sailkapena izango dute. 11:00etan egingo dute estropada bihar.
KAE1, oso lehiatua
KAE1 ligako lehenengo taldean lehenengo sailkatua eta bigarrena berdinduta daude, 124 puntotara. Deusto eta Zarautz dira, eta denboraldi bikaina egiten ari dira biek. Zumaia ere atzetik dute, 11 puntotara. Oraindik bost bandera dituzte aurretik. Hondarribiko traineruak, aldiz, ez du denboraldi onena izan oraingoz. Ongi hasi ziren, bosgarren eta seigarren postuak lortzen, baina pixkanaka beheraka joan dira, eta oraingoz, bigarren txandari eusten diote, Lapurdi eta Hibaika atzetik mehatxuka izanik. 11:50earako dute programatuta biharko estropada.
Euskotren liga, emozio gutxirekin
Arraun Lagunak taldeak irabazi ditu estropada guztiak aurtengo emakumezkoen lehenengo mailan. Emozio askorik gabeko liga dela diote batzuek, baina behera begira oraindik badago lehia. Zumaia da azkena, eta oraingoz berak izango luke zuzeneko jaitsiera ETE ligara. Donostiarrak aldiz, play off postuak ditu, eta Hibaika du aurretik, 8 puntotara. Sei estropada dituzte aurretik, tartean Zarauzko bandera. Play offak iraila amaieran izango dira. Igandean, 11:25ean aterako dira lehen traineruak.
Euskolabel ligan, zaila baina ez ezinezkoa
Denboraldia hasi baino lehen, oraindik trantsizio urteetan daudela azaldu duen Mikel Orbañanos Hondarribia Arraun Elkarteko gizonezkoen lehen traineruaren entrenatzaileak. Ohorezko txandara iristea eta hari eustea izan da azken estropadetako helburuetako bat. Baina jada, Donostian bigarren postu bat lortuta, eta beste hiru hirugarren postu garaituta, oraindik badute banderaren bat lortzeko ametsa. Aurrean, Orio, irabazle handia, garaiezin dirudien trainerua. Oso zaila izango du Ama Guadalupekoak lehen hainbeste ikusten ziren banderetako bat lortzea, baina maila ederra erakutsi nahiko dute etxean. Igandean, 12:20ean izango dute estropada.
