Bide segurtasun neurri berriak Egiluze ikastetxean
Zebra bidea eta piktograma handi bat margotu dituzte.
Eskola alboetan trafikoa murrizteko hainbat neurri hartu ditu Hondarribiko Udalak azken urteetan. Plataformak jarri dira, autoek abiadura murrizteko, eta konturatu daitezen arrisku handiko eremuak direla. Baserritar etorbidean Talaia eskolan argi ikusi daiteke. Orain, Egiluze ikastetxean beste hainbat neurri hartu ditu udalak.
Egiluze ikastetxeko plataforma izan zen ezarritako lehena, baina orain, beste hainbat gehigarri jarri dituzte. Plataforman piktograma bat eta zebra bidea margotu dituzte, eta era berean, semaforoak jarri dira. Beste eskolekin alderatuta, Egiluzeren kasua berezia da, herri sarrerako errepide garrantzitsu batean kokatuta dagoelako.
“Eskola inguruetako segurtasuna lehentasunezkoa da udalarentzat. Aurretik ere, hainbat neurri hartu genituen, baina ikusi dugu beharrezkoa zela beste urrats bat ematea. Horregatik, seinaleztapena indartu dugu lurreko piktogramekin eta zebrabide zabalarekin, eta semaforo berriek ere haurren segurtasuna hobetzen lagunduko dugula espero dugu”, azaldu du Estitxu Urtizberea Hirigintza zinegotziak.
Udalak baliabideak jartzen ditu, baina ardura ibilgailuen gidariena da. “Hondarribiko Udalak, azkenik, dei egin die gidari guztiei eskola inguruneetan arreta bereziaz gida dezaten, abiadura-mugak zorrotz errespeta ditzaten eta oinezkoei lehentasuna eman diezaieten”.
