Valentziatik Arkollara, mihise eta pintzel artean
Enrique Albizu margolariaren erakusketa bat izango da ikusgai gaurtik aurrera Arma Plazan. Maila handiko margolariak Hondarribia izan zuen bere txoko kuttuna.
Valentzian jaio zen Enrique Albizu, baina Goizuetakoa zuen familia. Bere aitak burdinarekin egiten zuen lan, CAF enpresarentzat, eta Mediterraneora mugitu zen, lanak bultzatuta. Baina gerra zibila zela eta, hamar urte ingururekin iritsi ziren Albizutarrak Euskal Herrira berriro ere. Jada 10 urterekin hasi zen margotzen, eta hasieratik talentu handia erakutsi zuen. Talentu hori, baina, asko landu zuen bere bizitzan zehar, eta horrek Europan osoan zehar eta Ameriketan barrena eraman zuen. Mundua ezagutu zuen, baina bera Hondarribiaz maitemindu zen. Arkolla auzoan bizi izan zen urte askoz, bertako paisaiak maisutasunez irudikatuz. Gaurtik aurrera bere hainbat obra daude ikusgarri Arma Plazan, bigarren solairuan.
Pintura errealistak dira Albizuk landutakoak, baina Iñaki Ruiz de Eginoren ustez, naturalistak. Erakusketako komisarioa da Ruiz de Egino, eta berak dio bakoitzak gure errealitatea irudikatzen dugula, eta beraz, milioika errealitate ditugunez, bakoitzak bere moduan ikusi dezakeela obra. “Euskal pinturaren barnean pertsonai bitxia da Albizu. Paisaia modu inpresionistan kudeatzen zuen, atzealdean kolore laranja bat erabiliz, eta ondoren kolore ilunagoekin egiten matizak”, azaldu du komisarioak. Udazkenean egiten zituen bere paisaia pinturak eta soilik ilunabarrean. “Askotan korrika ibiltzen ziren nire aita eta ama, paisaia zegoen tokira korrika, kotxean. Iluntzeko 30 minutu falta zirela edo aritzen zen, korrika, margotzen”, esan du Oaya Albizu, Enriqueren alabak.
Erakusketako margolanetan Hondarribiko eguneroko irudiak ikusi daitezke. “Paisaiak, kaleak, arrantzaleak, aiton amonak haien bilobekin… eguneroko irudiak dira, eta hori bera maite zuen Enriquek”, azaldu du Ruiz de Eginok. Valentzian hasi zen margotzen, ondoren Madrilen jarraitu zuen eta beranduago Romara joan zen. “Romako pinturak influentzia handia izan zuen beregan. Italian asko formatu zen, asko ikasi zuen. Urteen poderioz bere lana maila handiagoan proiektatzen hasi zen”. Bere garaian, Oteiza, Mendiburu eta Basterretxea abangoardian murgildu zirenean, bera estilo klasikoan jarraitu zuen”.
Erakutsi beharrekoa
Erakusketako pinturak Albizuren alabarenak dira gaur egun, baina berak argi dauka bere aitaren lanak erakutsi egin behar direla, eta haien lekua museoak direla. “Valentziako Arte Ederren museoan donazio bat egin berri dut, eta gustu handiz hartu dute lana. Beste museo batzuetan, Bilboko Arte Ederretakoan adibidez, eskaini dut, baina ez dut ezta erantzunik jaso”, azaldu du Albizuk. Bere aitaren memoria bizi mantendu nahi du, eta gainera, gazteek ikustea garrantzitsua iruditzen zaio.
100 urte egingo dira hurrengo astean Albizu jaio zela. Hori izan da erakusketa egiteko arrazoi nagusia. Horrez gain, Ortzi Alonso Kultur zinegotziak adierazi du agian hemendik aste gutxitara bisita gidatu bat egingo dutela, erakusketa erakutsiz eta udaletxeko areto nagusian amaituz. Udalbatzak egiten diren aretoan Albizuren beste hiru pintura daude, urteak daramatzatenak udaletxea apaintzen.
