Ia 500.000 kilo hegaluze harrapatu dituzte Hondarribiko barkuek
Hondarribiko portuan 266.807,10 kilo hegaluze saldu dira azken asteetan, eta kanpoaldean (hondarribiarrek) 154.519,90 kilo.
Done Pedro Itsas Gizonen Kofradiako web atariko argazkia. Hegaluze kanpaina bete betean daude arrantzaleak, eta badirudienez, ongi hasi dute uda. Antxoarekin zenbaki onak lortu zituzten barkuek, eta gogo handiarekin hasi dute hegaluzeen denboraldia, kanpaina herriko jaiak baino lehen amaitzeko itxaropenarekin. Ekainaren 11n izan zen Hondarribiko portuan lehen hegaluze deskarga Beti Itxas Argi itsasontziak egindakoa, 1.689 kilokoa. Harrezkeroztik, San Pedro eguna arte eta uztaileko lehen egunetan, 266.807,10 kilo saldu dira Hondarribian bertan.
Hegaluzeak xaxian harrapatzen dituzten ontziak izaten dira lehenengoak arraina harrapatzen. Aurten, ohikoa baino lehenago harrapatu zituzten lehenengoak, eta horrek itsasontzi handien presak areagotu zituen. Espero baino lehenago atera ziren ontziak itsasora, ekainaren 11n eta 12an, lehenengo antxoa bila, betta moduan erabiltzeko, eta ondoren hegaluzeen arrastoei jarraituz. Aurten Hondarribiko 17 itsasontzi izango dira hegaluzearen kanpainan.
Urrutian
Oraingoz arraina urruti dabil, eta beraz, itsasontziak eta arrantzaleak baita ere. Kostalde gertuenetik ia 150 milla baino gehiagotara daude orain itsasontzi gehienak, Galizia eta Asturiasen ateko mugaren iparraldean. Hain urruti egonda, zail izaten dute Hondarribira itzultzea, horrelako bidaiak dituen kostuak direla eta. Horregatik, Kofradiak emandako datuen arabera 154.519,90 kilo saldu dituzte Hondarribiko itsasontziek beste lonjetan, hala nola Asturiasen (Xixon edota Aviles) eta Kantabrian (Laredo edota Santoña).
Beraz, Hondarribiko baxura itsasontziek ia 500.000 kilo harrapatu dituzte lehen asteetan. Itxaropenarekin begiratzen dute uda.
