Egin Ttap!, ingurune digitalean ere euskaraz
Bigarren edizioan, Irungo, Hondarribiko eta Hendaiako 30 ikasle taldek parte hartu dute gazteen artean euskara sustatzeko asmoz.
Bidasoa-Txingudi Partzuergoak euskararen alde lanean jarraitzen du, eta Irungo, Hondarribiko eta Hendaiako Euskara arloekin elkarlanean Egin Ttap! egitasmoaren bigarren edizioa egin dute aurten. Maiatzaren 11tik ekainaren 12ra bitartean egin dute, eta beste urte batez arrakastatsua izan da. Guztira, zazpi ikastetxetako lehen hezkuntzako 5. eta 6. mailako 30 taldek parte hartu dute. Egitasmoaren helburu nagusia gazteen artean euskara sustatzea da, komunikazio eta harreman tresna gisa.
Egin Ttap! euskara inguru digitalean eta parte hartzailean ere presentzia edukitzeko sortu zuten, batez ere, gazteek ere arlo horietan euskaraz bizi daitezen. Era berean, teknologia berrien bidez espazio erakargarria, irisgarria eta dibertigarria sortzea da. Asteotan, hainbat erronka egin behar izan dituzte.
Honela, kultura orokorra, natura, musika, geografia edo ingurunearekiko ezagutza bezalako gaiak landu dituzte. Lehiaketatik harago, hiru udalerrien arteko loturak estutzen laguntzen du egitasmo honek, talde dinamikak indartuz eta lurraldearen ezagutza partekatua sendotuz, belaunaldi berrien ohitura digitaletara egokitutako proposamenen bidez.
