Behin-behineko Lehen Mailako Arreta zentroko obrak hasi dituzte
Zentro berria gaitzeko obrek milioi bat euroko aurrekontua izango dute, eta sei hilabeteko epea izatea aurreikusi dute.
Oinaurreko osasun zentroa eta Irun Erdialdeko anbulatorioa egin bitartean, Lehen Mailako Arretako zentro berria gaitzen hasi dira gaur. Elizatxo hiribideko 3. zenbakiko zentro berri honek pediatria kontsultak izango ditu Oinaurreko eta Erdialdeko anbulatorioak amaitu bitartean. Birgaitze obrek milioi bat euroko inbertsioa edukiko dute, eta sei hilabeteko epea izango dute. Obrak Bidasoako ESIaren 2025-2035 Plan Zuzentzailearen baitan kokatzen dira. Eraikin berri honi esker, eskualde osoko osasun arreta eraldatuko eta hobetuko dute.
Osakidetzak argitu du zeintzuk diren planaren helburuak: zerbitzuak hobeto integratzea, azpiegiturak modernizatzea eta laguntza-eskari berrietara egokitzea. Horretarako ezinbestekoa izango da Lehen Mailako Arretako unitateak berritzea eta espazio zabalagoak eta funtzionalagoak sortzea.
Birgaituko duten espazioak 580 metro karratuko solairu bakarra edukiko du. Medikuntzako eta erizaintzako hamabi kontsultategi, larrialdietako gela bat, egokitutako jolas-gunea duen itxarongune bat eta pazienteari arreta emateko gunea izango du behin-behineko zentro honek.
Irunek bi osasun zentro ditu 67.759 pertsonari zerbitzua emateko: Erdialdekoa eta Dunbokoa. Bi eraikin hauek nahiko zaharkituta daude; gaur egun, ez dira baliagarri zentro bakoitzeko 30.000 hiritarrei arreta emateko. “Ez dira eraikin funtzionalak asistentzia-premien ikuspegitik, eta, beraz, azpiegitura berriak eraiki behar dituzte”, adierazi dute Osakidetzak bidalitako oharrean.
2027an, Oinaurreko anbulatorioko obrak hasiko dituzte. Erdialdekoak, berriz, ez du obrak hasteko aurreikusitako data zehatzik. Inbertsio hauek ez dira eskualdeko azpiegiturak hobetzeko egingo dituzten inbertiso bakarrak. Bidasoko Ospitaleko bloke kirurgikoko obrak dagoeneko hasiak dira, eta 11 milioi euroko inbertisoa izango dute. Goi teknologiako ekipamendu guztiak berritzeko aurrekontu osoa 23 milioikoa izango da.
