Banderarekin hasi du ETE Liga emakumezkoen traineruak
Igandeko estropada irabazi zuen emakumezkoen taldeak Pasaian, eta larunbatean bigarren izan ziren. Bigarren taldea bosgarren kokatu da sailkapen orokorrean.
Arraun elkarteko hiru traineruetatik bik hasi dute haien denboraldia. ETE Liga eta KAE1 Liga hasi dira asteburuan, eta jada ikusi dira elkarte bakoitzaren asmoak. Hondarribia Arraun Elkarteko emakumeek helburu argia dute aurten: berriro ere Eusko Tren Ligara itzultzea, eta bide hori hartu dute, lehen bi estropadetan jada bandera eskuratuz. Atzo, igandea, Pasaian jokatutako V. Hernaniko banderan gailendu ziren arraunlariak.
Astilleron hasi zuten denboraldia bi ligek. Emakumezkoen trainerua ederki hasi zen larunbatean, lehen postuari eutsiz, eta hala izan zen bigarren ziabogara arte. Zarauztarrek hartu zuten lidergoa, eta estropada lehen postuan amaitu zuten. Hondarribia, aldiz, bigarren, segundo batera. Kaiku izan zen hirugarrena, eta horrela, denboraldiko hiru faboritoak nortzuk izango diren argi utzi zuten.
Atzo, aldiz, lehia estua izan zen lehen bi ziabogetan. Kaikuk eman zuen lehen ziaboga lehen, baina bigarrenerako lehia estua zegoen estropada eremuan. Azkenean, Hondarribia Arraun Elkarteak igaro zuen helmuga lehen, bigarrenari, Zarautzi, ia zazpi segundo aterata. Beraz, sailkapen orokorrean Zarautz eta Hondarribi ikus daitezke lehen postuan, biak 15 punturekin. Hurrengo estropada larunbatean egingo dute, Elantxoben. Emakumezkoen traineruak hainbat bandera lortu nahi ditu aurten, Eusko Tren Ligara itzultzeko asmoarekin, eta oraingoz, bide onean dabiltza.
Lehia fina
Arraun elkarteko bigarren traineruak ere maila ona erakutsi du denboraldi hasieran. Larunbatean, Astilleron, seigarren postuari eutsi zioten. Bigarren txandan aritu ziren, eta lehen ziabogan jada Zumaiako eta Zarauzko arraunlarien traineruak aurrean jarri ziren. Azkenean, Zarautz Gesalga Okelan taldeak eraman zuen bandera etxera, ETE Ligan bezala. Igandean, aldiz, bigarren txandan lehiatu zen bigarren trainerua, eta bigarren postua lortu zuten, San Pedroren atzetik. Estropadako sailkapen orokorrean bosgarren izan ziren, eta ligako sailkapen orokorrean ere bosgarren kokatu dira, 15 punturekin.
Asteburu honetan Plentzian lehiatuko da bigarren taldea. Era berean, gizonezkoen lehen taldeak lehen estropada izango du, Buitrago de Lozoyako urtegian, Madrilen.
