Erraldoiek topo egingo dute Irunen
Ondare Kultur Elkartearen 15. urteurrenaren harira, ekainaren 6an erraldoi eguna egingo dute Istillaga plazatik hasita.
Ondare Kultur Elkarteak 15. urteurrena izango du aurten. Egun seinalatua ospatzeko Erraldoi Eguna egingo dute datorren larunbatean, ekainak 6, Istillaga plazatik hasita. Ondareko hamabost erraldoi, tartean Luis Mariano, eta lau buruhandiek lagun berriak ezagutuko dituzte, haiekin batera ibiliko baitira Iruñeako San Juan auzoko erraldoiak, Barañaingoak, Donostiako Antigua auzokoak, Martorellekoak eta Maulekoak.
Konpartsa hauetako guztietako erraldoi eta buruhandiek ezaugarri komun bat dute: beren herriko historia, tradizioa eta kultura era argian islatzen dute. San Juan auzokoek euskal folkloreko pertsonaiak irudikatzen dituzte, Barañaingo Beriniano eta Beriniana artzain bikote bat irudikatzen dute, Antiguakoek danborradako pertsonaiak omentzen dituzte, Martorellekoak Pont del Diableko kondairan inspiratuta daude eta Maulekoek Zuberoako maskarada irudikatzen dute.
Elkarretaratzea 11:00etan izango da Istillaga plazan, eta 11:30ean desfileari ekingo diote. Honako ibilbidea egingo dute sei konpartsetako erraldoi eta buruhandiek: Erromes plaza, Santiago kalea, Eskoleta karrika, Fermin Calbetón kalea, Foruen karrika, Karrika Nagusia, San Juan Harria plaza, Eliza karrika, Berrotaran karrika, Joaquín Gamón kalea, Luis Mariano kalea, Gipuzkoa hiribidea, Colon ibilbidea, Zabaltza plaza, Colon ibilbidea, Fermín Calbetón kalea, Eskoleta karrika, Santiago kalea eta Erromes plaza.
Nuria Alzaga Kulturako ordezkariak egun honen garrantzia azpimarratu du, sanpedro eta sanmartzialen bezperetan: “Gure kaleak beste leku batzuetatik iritsitako erraldoiez betetzea aukera bikaina da Irungo jaietako giroari benetako hasiera emateko”.
