Herri Bazkarirako tiketak, bihartik aurrera
Bihar, hilak 28, 12:00etatik aurrera eskuratu ahalko dira aurtengo Herri Bazkarirako tiketak Betti Gottiren webgunearen bitartez.
Sanmartzialak hasteko hilabete bat besterik ez da falta, eta urtero legez, jaiei hasiera emateko Betti Gotti elkarteak Herri Bazkaria antolatuko du ekainaren 20an, Ficoban. Bihar, hilak 28, jarriko dituzte bazkariko tiketak salgai eta Betti Gotti elkartearen webgunearen bitartez erosi beharko dituzte irundarrek. Biharko 12:00etatik aurrera igandera bitarte, kuadrillek nahi adina tiket erosi ahalko dituzte, 20 euroan. Guztira, 1.600 pertsonentzako lekua izango da antolakuntza zailtasunengatik.
Herri Bazkarirako tiketen salmentarekin batera, Kuadrilla Eguneko aurtengo egitaraua aurkeztu dute. Martxoan, iragarri zuten moduan aurtengo Kuadrilla Eguna bi egunetan izango da, ekainaren 20an Herri Bazkariarekin eta 27an, Goitiberen Sari Nagusiarekin. Dagoeneko bi egunotako programen xehetasunak argitaratu dituzte.
Herri Bazkaria girotzeko Peña Poteo txarangak eta trikitilariek Alde Zaharreko kaleak girotuko dituzte, eta 13:00etan ohikoa den kalejira egingo dute Urdanibia plazatik Ficobaraino. Herri Bazkaria 14:15ean izango da, eta bazkalostean, Dj Balberren eta Burrunba elektrotxarangaren txanda izango da. 20:30ean, Erdialderako itzulerako kalejira egingo dute Ficobatik hasita.
Ekainaren 27an, Herri Gosaria egingo dute Urdanibia plazan, 09:00etan eguna ondo hasteko eta festetarako indarrak hartzeko. 10:00etan, V. Goitiberen Sari Nagusia egingo dute. Bazkalordua heldu aurretik, Txintxarrik, Peña Poteok eta Burrunbak Urdanibia plazako inguruak alaituko dituzte. 14:30ean, kuadrillen arteko bazkaria eta bingo musikatua egingo dute plazan bertan, eta arratsaldean kamiseten lehiaketaren sari banaketa egingo dute, 17:30etik aurrera.
