Betti Gotti elkarteak ekainaren 20an herri bazkaria eta 27an gosari herrikoia antolatzea eskatu du
Herri bazkaria ekainaren 20an antolatzea aldebakarreko erabakia izan dela salatu du elkarteak, eta data adostu gabe egin izanak egun horretan antolatzeko arazoak izan dituzte.
2025eko herri bazkariko irudia.Oier Iriarte Arrondo 2026ko sanmartzialetarako bi hilabete falta diren honetan, herri bazkariak hautsak harrotu ditu Irunen. Betti Gotti elkarteak 2009. urtean lehen herri bazkaria antolatu zuen Uranzu pilotalekuan, eta ordutik izugarrizko hazkundea besterik ez du izan. Egun, 1.800 irundar biltzen dira Ficoban jai giroan antolatzen duten herri bazkarian. Herritarrik gabe ez dago herri bazkaririk, eta betidanik eguna erabakitzeko irizpidea jendeari begirakoa izan da, haien beharrak kontuan hartuta. Ekainaren 23tik uztailaren 2ra bitarte egongo den larunbatean antolatu ohi izan dute. Aurten, ordea, udalak ez du elkartearekin data adostu, eta alde bakarreko erabakia izan dela salatu du elkarteak.
“Martxoaren 9an, DVk ateratako albistea antolakuntzarekin hitz egin gabe egitea errespetu faltatzat hartu dugu. Ez zaigu bidezkoa iruditu udalak data gurekin adostu duela esatea, hau horrela izan ez denean”. Martxoaren 18an, udalarekin lehen hartu-emanak izan zituzten, eta teknikariekin bildu ondoren, elkarteak udalari proposatu dio herri bazkaria ekainaren 20a egitea, “bere kalejira eta guztiarekin”; eta ekainaren 27an, herri gosaria, Gotti Betti lehiaketa, txaranga eta egun osoko programazio luzearekin.
Elkarteak ez du erabakiaren gaineko erantzunik jaso, eta data adostu gabe erabaki izanak arazo larriak eragin dizkio elkarteari. “Aurretik hitzartutako datetan katering langileak, musika teknikariak, txarangak, kontzertuetako taldeak eta bestelako langileak lotuta genituen”, adierazi dute. Hori horrela, Betti Gotti derrigortuta dago ekainaren 20an herri bazkaria antolatzea. “Aurten jaietatik kanpo utzi gaituzte”.
Lehen aipatu bezala, herri bazkaria data horien artean antolatzen dute. Hala ere, bi salbuespen daude ekainaren 29a, San Pedro eguna, eta aurreko eguna, alegia, bezpera. Bi egun horiek Irunen garrantzi handia dute. Hala eta guztiz ere, argi adierazi dute ez dutela gerra batean murgildu nahi. “Kuadrilla egunean murgildu nahi dugu, betiko giro herrikoian eta osasuntsuan. Sasi guztien gainetik eta laino guztien azpitik hegan itxarongo zaituztegu”.
