Aisialdian eta kirolean ere euskaraz
'Kalean bai' planaren 2026-2030 epealdia aurkeztu dute, eta honen bidez, haurrek eskolaz kanpo euskaraz bizitzeko aukera izango dute.
Kalean bai egitasmoaren 2026-2030 epealdia aurkeztu dute, eta lau urteotan Irungo haurrek eskolaz kanpoko orduetan euskaraz hitz egiteko bultzada eman nahi diote. Aurkezpenean, Josu Iguiñiz Euskara ordezkaria, Arantza Zulet Euskararen Erabilera Sustatzeko eta Normalizatzeko Zerbitzuko teknikaria eta Lide Rekondok, Siadeco Ikerketa Elkarteko ordezkaria izan dira. “Ahalegin hori guztia gal ez dadin, ezinbestekoa da hizkuntzak eguneroko bizitzan ere lekua izatea, bereziki haur eta gazteen artean, hizkuntza-ohiturak finkatzen diren adin horretan”, adierazi du Iguiñizek.
2002an sortu zuten egitasmoa eta ordutik 113 elkarte izan dira elkarlanean. Egun, euskaraz jolastu, euskaraz kirola egin eta euskaraz lagunartean aritzeko 64 elkartek dute sinatuta hitzarmena. Egitasmo honen bitartez, kirol-pistan, dantza-taldean, auzo elkartean, festetetan eta aisialdiko jardueretan euskaren presentzia sustatuko dute. “Kalean Bai Planak hogei urtetik gorako ibilbide sendoa du Irunen, eta orain ibilbide hori are sendoagoa egin nahi dugu”.
Etapa berri honek hiru helburu estrategiko izango ditu. Batetik, 64 elkarteekin lanean sakontzea, mikroplan pertsonalizatuak adostuta eta urratsak progresiboki ematen lagunduta. Eta beste alde batetik, entitate berriak erakartzea eta Kalean Bai marka indartzea euskarari balioa emanda. Planak genero ikuspegia ere zeharkako ardatz gisa txertatuko du bere jardunean.
Lau urteotan, entitateenganako lan pertsonalizatua egiten ahaleginduko dira; beti ere, kirol esparruari arreta berezia emanik. Taldeekin lan berezia egingo dute, mailaka, LH 3.etik LH 6.etik jarraipen lana egingo dute eta oporrraldietako kirol campusetan ere euskara sustatuko dute.
Jaietan ere euskaraz
Siadecok udalarekin batera, sanpedrotan eta sanmartzialetan haur eta gazteentzako ekitaldiak antolatuko ditu. Halaber, 27 elkartek hizkuntza protokolo orokorrak prestatuko dituzte. Komunikazio plana, sentsibilizazio kanpainak, formakuntzak eta laguntza teknikoa eskainiko dituzte, aitortza eta errekonozimendu publikoa sustatzeaz gain.
Jardueren emaitzen jarraipena bermatzeko Siadecok eta Euskara zerbitzuak lan egitura zehatza jarri dute martxan aurrerapausoak ebaluatzeko. “Irun ere euskalduna da. Irunen ere euskaraz aritzen gara. Horregatik, lanean jarraituko dugu euskarak behar duen tokia lor dezan”.
