Zortzi urteren ondoren, mailaz igo da Hondarribia Futbol Elkartea
Mutilen lehenengo taldeak atzean utzi du Gorengo Maila, eta datorren urtean Ohorezko Erregional Mailan jokatuko du. Larunbatean festa giroa izango da Ondartzan.
Denboraldi ederra Hondarribia Futbol Elkarteko gizonezkoen lehen taldearentzat. Urtean zehar edukitako dinamika onak lehenengo postura eraman ditu. Aurreko astean, Behobiari irabazita, maila igoera bermatu zuten, bigarren sailkatua, Ostadar, bost puntutara utzita. Larunbatean denboraldiko azken partidua jokatuko dute, etxean. Festa giroa gailenduko da Ondartza futbol zelaian.
Javi Etxebestek, Ion Arzak eta Jon Agirrek zuzendutako taldeak emaitza ederrak lortu ditu. Hori, egindako lanaren fruitua izan da. 2006ko belaunaldiak protagonismo handia lortu du haien lehen urtea, eta horren adibide da Julen Kerejeta, 20 gol sartu ditu eta aurrelariak. Talde ederra osatu dute, herriko eta inguruko jokalariekin. Badira ere urte luzez kanpoan egon ondoren etxera itzuli diren jokalariak. 18 partidu irabazi dituzte, 8 berdindu eta 3 galdu.
Larunbatean, 16:00etan jokatuko dute Internacional talde donostiarraren aurka. Festa giroa alaitzeko Abiyuan txaranga kalejira bat prestatu du zelairaino. Partiduan zehar ere musikariak bertan izango dira, eta ondoren, bukatzerakoan, Hondarribiako rua partikularra egiteko asmoa dute jokalariek eta klubak. Ordutegiak zehaztu ez diren arren, Portua auzotik ibiliko dira jokalariak, merezi duten igoera ospatzen.
Zorionak Hondarribia FE!
