Super Amara BAT taldeko emakumeak Espainiako talde onenen lehian
Leonen jokatutako Ohorezko Mailako bigarren jardunaldian lehenengoak izan dira, eta garaipen horrek finalerako txartela eman die.
Super Amara BATeko emakumeak, Leonen. Super Amara BAT Super Amara BAT taldekoen emakumeen denboraldia “hamarrekoa” izaten ari da. Asteburu honetan, “emaitza historikoa” lortu dute Leonen. Ohorezko Mailako bigarren jardunaldian lehenengoak izan ziren, historian lehen aldiz. Garaipen honi esker Espainiako taldekako txapelketako finalerako txartela eskuratu dute, eta ekainaren 13an Iruñean izango dira Espainiako zortzi talde onenekin batera. Leonen 201 puntu poltsikoratu zituzten, eta sailkapen orokorrean Ohorezko Mailako laugarren talde onena izan dira.
Larunbateko jardunan, bederatzi garaipen, bost bigarren postu eta zortzi hirugarren psotu lortu zituzten Super Amara BAT taldeko emakumeek. Bidasoarrekin batera, L’Hospitalet, A.D Marathon eta Univ. Leon Sprint Atletismo taldeak izan ziren. Bigarren sailkatuari hemezortzi puntuko aldea atera zioten, eta hasieratik amaierara arte nagusi izan ziren.
Gizonezkoen taldeak ez zuen bere egun onena izan. Larunbatean, Atletismo Alcorcon, UCAM Cartagena eta Atmo. Portugalete taldeekin batera izan ziren Madrilen. Bidasoarrak hirugarrenak izan ziren, 173 puntu lortuta. Lehenengo Maila Nazionaleko bigarren jardunaldia jokatu ondoren, maila mantentzeko finala jokatu beharko dute ekainaren 13an.
Guztira, bost garaipen, laugarren bigarren piostu eta sei hirugarren postu lortu zituzten bidasoarrek. “Gizonezkoek dena emango dute merezi duten maila arazorik gabe mantentzeko”, adierazi du klubak.
Gorengo mailako emaitzez gain, Super Amara BATeko harrobiak bolada onean dagoela berretsi du beste behin ere. Dynamic New Athletics infantil mailako Espainiako lehiaketa loriatsuena da, eta bertan hamabi harrobi onenek parte hartzen dute. Super Amara BATeko infantilak bosgarrenak izan dira, eta beste urte batez, Espainiako harrobi onenen artean izaten jarraitzen du.
