EAJk harenganako "gezur salaketari" erantzun dio
Asteazkenean udal gobernuak adierazpen instituzionala egin zuen, EAJren jarrera "oso larria" salatuz. Alkateak adierazi zuen jeltzaleek gezurra esan zutela aurrekontuen gastuen harira.
Atzoko adierazpen instituzionalari erantzun dio EAJ. Atzo, alkateak helarazi zuen alderdi jeltzaleak gezurra esan zuela apirileko udalbatzan, 2025eko gastuen harira. EAJk argitu nahi izan du haiek esandako datua, hau da, iaz 12,8 milioi euro kontu hartzailearen eragozpen edo kontrako txostenekin gastatu zirela, kontu hartzailearen txostenetatik ateratako datuak direla.
“EAJ-PNVk adierazitako datuak egiazkoak eta zorrotz landuak direla berresten du. Osoko bilkuran azaldu zen bezala, udal kontu-hartzailearen kontrol finantzarioko txostenaz harago, taldeak 2025ean zehar Kontu hartzaileak egindako dekretuak aztertu ditu, fakturen ordainketari buruzko eragozpenak edo oharrak jasotzen dituztenak”, esan du EAJk ohar bidez.
68 dekretu eta faktura zerrenda aurkeztu du EAJk, kontu hartzailearen eragozpenekin edo oharrekin. Guztira 13.101.207,37 euroko gastua islatzen da zerrendan. “Udalaren beraren dokumentaziotik ateratako datu objektiboak dira, ez interpretazio politikoak”. Jeltzaleek diote Abotsanitzek oposizioan zegoenean erabilitako irizpide berdinak aplikatu dituztela, eta orain, “ez dela onargarria” hori bera orain zalantzan jartzea.
EAJk partekatutako faktura zerrendan 68tik 30 erreparo txostenak dira, eta besteek oharrak dituzte. Oharrak dituztenak baiezko txostenak dira, baina kontu hartzailearen oharrekin. “Nolanahi ere, EAJ-PNVk ez du alderdien arteko desadostasunak eztabaida publikoaren erdigunean jartzen lagunduko. Herritarrek espero dute eguneroko arazoei konponbidea ematea eta hiriko etorkizuneko erronkei aurre egitea.Hondarribiak erantzunak behar ditu etxebizitza, aparkalekua, kirol azpiegiturak, zerbitzu publikoen egoera edo Txinzerreko greba bezalako gatazkei dagokienez, Garbigunea itxita mantentzen baitu, besteak beste”.
