Trafiko aldaketak, Emakumeen Itzulia dela eta
Txirrindularitza proba dela eta, igandean trafikoan murrizketak izango dira 10:40etik 12:15era arte hiriko hainbat lekutan.
Bihar aurtengo Emakumeen Itzulia hasiko da Zarautzen, eta igandeko hirugarren eta azken etapak Irungo kaleak zeharkatuko ditu. Goi mailako txirrindularitzak berriro zeharkatuko ditu hiriko kaleak, pasa den igandean, Bidasoa Itzuliak egin zuen moduan. Hori dela eta, trafikoan hainbat aldaketa izango dira goizean zehar, hain zuzen, 10:40etik 12:15era izango dira.
10:40ean, GI-636-K errepidea itxiko dute Kateko ordainlekutik eta Araso industrialdetik. Horregatik, AP-8tik datozen ibilgailu guztiak GI-636 errepidera desbideratuko dituzte. 11:15etik aurrera, hiriko erdialdeko trafikoak murrizketak izango ditu. GI-636 errepidetik eta Zubimusu plazatxotik Hondarribira joateko bidea itxiko dute, baita Letxunborro hiribidea, Hondarribia kalea, Colon ibilbidea, Gipuzkoa hiribidea eta Elizatxo hiribidea ere.
Garraio publikoan aldaketak izango dira goizean zehar. Renferen geltokira sartzeko eta irteteko Anaka kalea erabili beharko dute lasterketa iraun bitartean. Irunbuseko zerbitzuak ere ordutegian aldaketak izango ditu, 11:00etatik 12:30era. Aldaketa guztiak ohiko kanaletan helaraziko dituzte. Udalak gogoratu du Txanaleta plazako autobusen geltokia itxita egongo da 12:00ak arte.
Lasterketa amaitutakoan, murrizketak kenduko dituzte 12:15ak aldera. Bitartean, saihesbideak erabiltzeko deia egin diete irundarrei.
