Landetxa jaietan murgilduko da bihartik igandera
Bihar, 17:15ean hasiko dira eta jarduera ugari antolatuko dituzte asteburuan zehar adin guztietarako auzotarrentzat.
Larreaundi Olaberriak auzoetako jaien denboraldiari hasiera eman zien maiatzeko lehenengo asteburuan, eta asteburu honetan, Landetxakoen txanda izango da. Bihartik, hilak 15, igandera bitarte auzoan hamaika jarduera antolatuko dituzte auzotarrek. 17:15ean hasiko dira aurtengo jaiak, eta eskaintza zabaleko hamaika jarduera izango dituzte asteburuan zehar.
Jaien lehenengo eguneko protagonistak auzoko haurrak izango dira, eta Potx magoaren ikuskizuna, buruhandiak, kolore festa, txaranga eta DJa izango dira ordu txikiak arte. 19:30ean, kolore festa egingo dute eta txuriz janzteko deia egin diete bizilagunei.
Larunbatean, jaiak goizean goizetik hasiko dira txistularien eskutik. 10:30ean tortilla lehiaketa antolatuko dute, eta sukaldari ausartenek tortilla prestatzen ari diren bitartean, etxeko txikientzat marrazki lehiaketa egingo dute. Parte hartzaileen marrazkiak aste osoan zehar erakusgai izango dira auzoelkartearen egoitzan. Gastronomiak lekua izango du jaietan, eta bazkalorduan herri paella egingo dute, 14:30ean hasita. Arratsaldean, berriz, Bakailu lehiaketaren txanda izango da, 18:00etatik aurrera. Peña Poteo txarangak kaleak alaituko ditu eta 23:00etan Joselu Anayak taldeak egunari amaiera emango dio.
Larunbatean egin moduan, txistulariek hasiera emango diote jaien azken egunari. Larunbateko egun luzearen ondoren, haurrek atseden hartzeko ez dute astirik izango. 11:00etan, bederatzigarren kross txikia egingo dute auzoko kaleetan zehar. 11:45ean, gazteek tokan jokatzeko aukera izango dute, eta 12:00etan helduenen txanda izango da. Toka txapelketa Kateko elkartearen ondoan egingo dute. Azken eguneko protagonistak jubilatuak izango dira, eta Ongi Etorri jatetxean bazkaria egingo dute. 18:00tan, herri kirolen erakustaldia egingo dute auzoko frontoian. Bertan, Arkaitz Etxebeste, Ainitze Zumeta, Ugaitz Mugerza eta Udane Ostolaza ariko dira. Jaiei amaiera emateko muxikoak alaitasunez eta jai giroan agurtuko dituzte aurtengo jaiak.
