Irugurutzetako labeen interpretazio zentroa inauguratuko dute
Hilaren 22an, ostiralarekin, interpretazio zentro berria irekiko dute, eta asteburuan zehar sarrera doakoa izango da.
Irun meatzaritza-ondare handiko herria da. Meatzaritzak lotura handia izan du hiriarekin, eta datorren ostirala, hilak 22, egun handia izango da. Irugurutzetako labeetako interpretazio zentro berria inauguratuko dute. Irekiera honen bitartez, Irunek meatzaritza-ondarea berreskuratuko du, eta hiriaren posizionamendu turistikoa indartuko ditu. Inaugurazioaren asteburuan sarrera doakoa izango da. Ostiralean, 16:00tan irekiera egingo dute eta 19:00ak bitarte aukera egongo da bisitatzeko. Larunbatean, hilak 23, 11:00etatik 13:00etara eta 16:00etara zabalik izango da; eta igandean, berriz, 11:00etatik 14:00etara. Laster inaugurazioaren baitan antolatuko duten egitarau berezia argitaratuko dute.
Interpretazio zentroa birgaitzeko obrek 2 milioi euroko inbertsioa eduki dute, NextGenerationEU funtsen bidez finantzatuta. Ondarearen irisgarritasuna hobetzeko, labeak goitik behera birgaitu dituzte, baita labeen inguruko eremua atondu ere. Museoak bost gune ditu eta hainbat elementutan azalduko dute Irungo meatzaritzaren eta industriaren historia. Esperientzia berritzailea eskaintzeko edukiak lau hizkuntzatan eskainiko dituzte. Gunearen goiko aldera igotzeko igogailu bat instalatu dute.
“Irugurutzetan egindako esku- hartzeekin, gure historiaren eta hiri gisa dugun nortasunaren parte bat berreskuratu dugu”, adierazi du Cristina Laborda alkateak. “Inaugurazio hau gure ondarea kontserbatzeko eta dagokion tokian jartzeko estrategia argi baten parte da, Oiasso museoaren edo termen kasuan egin dugun bezala”.
Meategi gunea irisgarriagoa izan dadin, Tren Txikitoaren zerbitzua martxan jarriko dute egun horietarako. Tren Txikitoaren erreserbak Oiasso Museoaren webgunearen bitartez egin beharko dituzte, ostiraletik aurrera.
