Amuteko eta Mendeluko biribilguneak EAJren ekimen politikoz egingo direla diote jeltzaleek
Maria Serrano bozeramaileak azaldu du EAJk proiektuak bultzatzeko kudeaketa gaitasuna erakutsi duela beste behin.
Astelehenean aurkeztu zuen Gipuzkoako Foru Aldundiak Hondarribian egingo diren hirigintza aldaketak, Bidasoaldeko Mugikortasun Planaren barnean. Amute eta Mendelu inguruan hiru biribilgune egingo dira, atzo Eider Mendozak azaldu zuenez. Hondarribiko EAJk bere adierazpenak plazaratu ditu, asteleheneko albistearen harira. “Proiektu oso garrantzitsua da, eta EAJren ekimen politikoari eta Foru Aldundiaren lanari esker, hainbat konponbide errealitate izango dira”, azaldu du Maria Serrano Hondarribiko EAJren bozeramaileak.
EAJk nabarmendu nahi izan du aurkeztutako plana ez dela errepide obra batzuetara mugatzen, “baizik eta eskualde ikuspegi koordinatu bati erantzuten diola”. Oroitarazi dute Amuteko eta Mendeluko hiru biribilguneen proiektuak aurrera doazela, eta jada erakusketa publikoan daudela, baina halere, ulertzen dute Mendeluko bizilagunek eszeptizismos begiratzea hori dena. “Normala da zuhurtzia egotea urte askotan proiektuei buruz hitz egin ondoren. Baina orain benetako jarduketen aurrean gaude, plangintza, finantzaketa eta izapidetze aurreratua dituzten jarduketen aurrean. Dagoeneko ez gara paperean dauden ideia edo proposamenez bakarrik ari”, gehitu du Serranok.
Jeltzaleek argi dute aldaketa berriekin segurtasuna askoz hobe bermatuko dela Hondarribian eta Irunen, eta bi herrien arteko lotura askoz hobeagoa izango dela. “Eskualdeko herritar askok luzaroan eskatu duten jarduketa da, eta aurrerapauso handia izango da bi udalerrien arteko eguneroko joan-etorriak oinez eta bizikletaz egiteko”.
Amaitzeko, Serranok esan “du zarata sortzera edo eztabaida antzuak planteatzera mugatzen direnen aurrea”, EAJk “beste behin erakutsi duela benetako proiektuak bultzatzeko kudeaketa gaitasuna, plangintza eta erakundeen arteko lankidetza” dituela oinarri.
