Eliz Musika Zikloa, 1983tik bizirik
42. edizioa egingo dute aurten. Jada, eliz musikaren erreferente handienetariko batean bilakatu da Hondarribiko parrokian egiten den zikloa.
Eliz musikaren erreferente bilakatu da Hondarribia azken hamarkadetan. Eliz Musikaren Zikloa da horren errudun nagusia. 42. edizioa egingo dute aurten, martxoaren 21eko asteburuan eta hurrengoan, martxoaren 28koan. Hondarribiko parrokia izango da erdigunea, eta hainbat abesbatzek hartuko dute parte, bai Hondarribikoak eta baita ere kanpokoak. “Kalitate handiko hitzordua da hau, dudarik gabe. Eliza bete izan da beste urteetan, eta aurten ere hori bera da xedea”, aipatu du Ortzi Alonso Kultura zinegotziak.
Hondarribiko Eskifaiaren ekimenez egindako musika zikloa da, eta 1983. urtetik egiten da. Larunbat honetan, Hots eta Xatz abesbatzek eskainiko dute kontzertua. “Hots abesbatzak egingo du lehenengo zatia, eta bigarren zatian Xatz batuko da, denak batera aritzeko. Amaia Zipitria pianistak lagunduko die”, azaldu du Juan Ignacio Aristizabal Eskifaiako kideak. Igandean, Akelarre abesbatza bilbotarra igoko da oholtzara, Xabier Mendezen zuzendaritzapean.
Bigarren asteburuan, martxoaren 28an zehazki, Kataluniatik etorritako L’ARC abesbatzak eskainiko du berea. Abesbatza horrek badu berezitasun bat, bere zuzendaria hondarribiarra baita. “Emilio De La Lindek zuzentzen du abesbatza kataluniarra. Bera Eskifaiako kide izan zen garai batean”, esan du Aristizabalek. Azkenik, martxoaren 29an Eskifaiak abestuko du elizan. “Azken bi egunetan elizan pantaila bat jarriko da, bertan abesbatzak gertutik ikusteko”. Eskifaiak Arkaitz Mendoza organistarekin batera egingo du bere kontzertua, eta L’ARC-ek Arnau Farrerekin.
Hirugarren mendekoa
Gorka Aierbe da Eskifaia abesbatzako zuzendaria. “Programazioko abestiak gehien bat ama birjinari zuzendutakoak dira. Guk musika erromantikoan oinarritutako kontzertua eskainiko dugu, XX. mendeko pare bat obra ditugu eta. Hiru zatitan izango da kontzertua, eta berezitasun moduan, bigarren zatian emakumezkoen eta gizonezkoen obrak egingo ditugu, testu berdinarekin”, azaldu du zuzendariak. Eskifaiak interpretatuko dituen piezen artean Sub tuum praesidium aurkitzen da, Aierbek azaldu duenez, ama birjinari eskainitako aurkitutako testurik zaharrena, hirugarren mendekoa.
Programa osoa ikusteko, egin klik hemen.
