Pediatria larrialdien egoeraren harira, mozioa aurkeztu dute osoko bilkuran
Urgencias Pediatricas Bidasoa elkarteak gauzatu du mozioa, eta babes instituzionala eskatzen dute.
Bidasoko Ospitaleko pediatria larrialdien egoera dela eta, Hondarribiko Udaleko osoko bilkuran mozioa aurkeztu du Urgencias Pediatricas Bidasoa elkarteak. “Eskualdeko haurrek eta nerabeek bizi duten osasun-egoera larria salatzeko” hartu dute erabakia. 2025eko apirilaren 13an zerbitzuak itxi ziren, eta, oraingoz, berdin jarraitzen du.
Mozioa justifikatzeko arrazoi nahikoa dituztela uste dute elkartekideek: “Zerbitzuaren itxierak 20.000 adingabe baino gehiago oinarrizko osasun-baliabiderik gabe utzi ditu, osasun publikoan sarbide bidezkoaren printzipioa urratuz. Gainera, gogorarazten dugu Osakidetzak adierazi zuela ospitaleko larrialdien desagerpena lehen mailako pediatriako arretaren hobekuntzarekin batera etorriko zela; promesa hori ez da bete, eta egoerak nabarmen egin du okerrera”. Elkarteak adierazi du gaur egun familia askok zailtasun asko dituztela pediatriako hitzorduak lortzeko, eta adingabe askok oraindik ez dutela pediatrarik esleituta.
Elkartearen ustez, ez da justifikagarria ospitalean erditzerik ez dagoela argudiatzea pediatriako larrialdi-zerbitzua ixteko, bi zerbitzu horiek funtzio asistentzial desberdinei erantzuten baitiete, eta haur-populazioak larrialdiko arreta medikoa behar izaten jarraitzen baitu.
Eskaera zuzena
Aurkeztutako mozioak xede argia du: Hondarribiko Udalak Eusko Jaurlaritzako Osasun Sailari eta Osakidetzari Bidasoko Ospitaleko pediatriako larrialdi zerbitzua berehala irekitzea eskatzea, behar adinako baliabideekin, “eta, halaber, pediatren esleipen eraginkorra eta bete gabeko osasun-plaza guztien estaldura bermatzea”.
