Elkarrekin Podemosek Bidasoko parkean suhiltzaileen kopurua handitzea eskatu du
Gipuzkoako bi suhiltzaile zerbitzuen bateratze operatiboa gauzatzea edo Donostialdearen inguruan parke berria eraikitzea eskatzen dute.
Elkarrekin Podemos kezkatuta dago Bidasoko suhiltzaileen egoera dela eta. Hornidura falta salatzen dute, eta hori handitzeko eskaera egin du Miren Etxebeste bozeramaileak. Gipuzkoako bi suhiltzaile zerbitzuen benetako bateratzea gauzatzea edo Donostialdean parke handiagoa eraikitzea eskatu du alderdiak, Bidasoa eskualdeko larrialdiei kalitatez erantzun ahal izateko. Hori egi bihurtu arte Bidasoko suhiltzaileen langile kopurua handitzea ezinbestekoa dela diote. HITZAk Bidasoko suhiltzaileen egoerari buruzko erreportajea ondu zuen iazko abenduan.
Donostiako suhiltzaile parkeetako suhiltzaileek agerraldia egin zuten joan den ostiralean. Bertan, agerian geratu zen Gipuzkoako Foru Aldundiaren eta Donostiako Udalaren arteko desadostasunek bi suhiltzaile zerbitzuen bateratze operatiboa atzeratzen ari direla. Gipuzkoa Babestu 2030 Planak hainbat hobekuntza aurreikusten ditu Suhiltze, Suteen Prebentzio eta Salbamendu Zerbitzuan larrialdien arretan kalitate asistentziala hobetzeko.
Gai berari lotuta, Etxebestek Gobernantza Batzordean Jon Insausti Donostiako alkatearen agerraldia eskatu du. Batetik, balorazioa ezagutzeko eta bestetik, etorkizunari begira zerbitzuaren beharrak zein diren jakiteko ere. Gainera, gogorarazi du Aldundiak Aritzetan bederatzigarren parke baten eraikuntza iragarri duela, eta lurralde osorako zentral bateratu bat izango du. Zentrala ez dago planean sartuta, eta zentral berriaren kokapenaren eta bi zerbitzuen integrazioaren gaineko zalantzak agertu dituzte Donostiako Udaleko suhiltzaileek.
