Iñigo, ez zaituzte inoiz ahaztuko
Itsas Etxean egin zuten Iñigo Muguruzaren omeneko emanaldia. Iñigoren Diszipuluek, Belek eta Matahk musikaz bete zuten aretoa.
Argazkia: Asier Jaraiz Iñigo Muguruza omendu zuten atzo, haren urtebetetzea ospatuz. Musikaz bete zen Itsas Etxea, txalo, irri eta malko artean. Muguruzatarren lagunak bertan ziren, baita ere ahaide eta lankideak. 19:00etan ireki zituzten ateak, eta pixkanaka betetzen hasi zen aretoa. Musika entzutera baino, elkartzera hurbildu zen jendea. 19:30ean eman zioten hasiera arratsaldeari Iñigoren Diszipuloek. Iñigo Muguruzaren ikasle ohiek sortutako taldeak musikari irundarraren talde ezberdinetako bertsioak kantatzen dituzte, haien irakaslea omenduz eta hark irakatsitakoa praktikan jarriz. Denok batera kantatu zituzten Presaka, Kunbia Sol Menorren edo Anti Regimen taldeko Miguelonek abestutako La linea del frente, seguru aski askok gaztetako garaiak gogoratuz. Bengo oiartzuarrak bere break dance mugimenduak erakutsi zituen diszipuloekin batera.
Ferminek hartu zuen hitza ondoren, egitasmoko bi kontzertu handiak hasi baino lehen. Bere anaia oroitu, eta eskerrak eman zituen, bertaratutako denei. Bele aurkeztu zuen, Lide Hernandok bideratutako proiektua, eta oholtzan agertu zen taldea. Dancehall eta disco doinuek hartu zuten Itsas Etxea, eta jendea, pixkanaka, askatzen hasi zen, hankak mugituz eta erritmoak jarraituz. Kontzertu amaieran dantzalekua zen Itsas Etxea. Euskaraz edozein musika egin daitekela aldarrikatu izan du Hernandok, eta ederki erakutsi zuen, jendearen txalo zaparradaren artean.
Reggae soinuak
Amaitzeko, Matah eta Chalart 58. Reggaea eta duba. Itsas Etxeko subwooferrak lanean jarri zituzten, soinu baxuen indarrarekin. Emanaldi kitzikagarria eskaini zuen musikari katalanak, eta bukaeran Chalart DJak abesti dantzagarri karibetarrekin itxi zuen Iñigoren urtebetetzea. Oholtzara igo ziren Fermin eta haren lagunak, ospakizuna amaitzera, elkarrekin dantzatzera. Hunkituta atera zen jendea Itsas Etxetik, Iñigori merezitako eguna emanda.
