Euskal Azoka emankorra Hondarribian
31. Euskal Azoka egiten ari dira gaur Hondarribiko Itsas Etxean. Goiza eder joan da; arratsaldean, askoz gehiago.
Azokaren irudi orokorra. Iraulia, berritua, biziberritua itzuli da Hondarribiko Euskal Azoka. Euskal Jaien egitarauaren barruko izarretakoa da 31.enez Itsas Etxean gauzatzen ari den euskaltzaleen eta kulturaren zaleen topagunea. San Pedro kaleko epeltasuna utzi, eta herriko kultur azpiegitura nagusira egin du jauzia azokak, goxo. Gaur hasi eta bukatuko da hamasei postu, eta zientoka argitalpen eta disko jaso dituen euskara usain eta doinuko azoka. Goiza emankorra izan da. Tartean da HITZAren postua.
10:00etan zabaldu ditu ateak Euskal Azokak. Normala denez, hasieran gehiago ziren postuak zaintzen ziren pertsonak, balizko bezeroak baino. Eguerdia iritsi ahala, ordea, girotzen joan da Itsas Etxearen areto nagusia, eta kuriositate begiradek, argitalpenen ukitze eta zeharkako irakurraldiek, eta bisitarien galderek diru-zorroen mugimenduari eman diote leku. Postuetako generoa ateratzen hasi da apurka.
Postuez aparte, hainbat hitzaldi eta aurkezpen izan dira goizean zehar. Horietako batek Hondarribiko aurtengo Euskal Jaien inspirazio iturri izan den Anton Abadia izan du epizentro. Koldo Ortega Lopezek, Harkaitz Cano Jauregik eta Antxoka Agirre Maiorak, Aitziber Zapirain Etxanizen gidaritzapean. Euskal Jaien jatorriaz, bilakaeraz eta Anton Abadiaren figuraz azalpenak eman dituzte. Hondarribiko Udalaren Erraldoi bizi-biziak argitalpenaren berri ere eman dute Ane Zubeldiak eta Irantzu Barrondo Eizagirrek; Argia-ko Gorka Bereziartua Mitxelenak eta Adur Larrea Egurenek Abentura erraldoia sormenaren gainekoak xehetu dituzte.
Arratsaldean askoz jarduera gehiago izango dira Itsas Etxean. Horien zerrenda, beheko koadro urdinean. Testu honen azpialdean, goizeko giroa irudikatzeko hainbat irudi.
31. Euskal Azoka. Arratsaldeko egitaraua
- 16:00etan zabalduko dituzte ateak.
- 16:15ean, Maurizia Biziminaren hotsa argitalpenaren (Xabiroi) aurkezpena Garbiñe Ubeda Goikoetxearen eta Ekaitz Agirre Garluk-en eskutik.
- 16:45ean, 2025eko Hatsaren poesia-ren aurkezpena (Hatsa) Ainara Maia Urrozen eta Auxtin Zamora Durrutyren eskutik.
- 17:15ean, Ni laiko (Alberdania) aurkeztuko du Markos Zapirain Agirrek.
- 17:45ean, Arantxa Urretabizkaia Bejaranoren txanda Zahartzaroaren maparen bila (Pamiela) aurkezteko.
- 18:15ean, aurkezpen kolektiboa Herrimina argitaletxearen eskutik: Zapalduon pedagogia edo nola libre hazi, hezi, bizi (Ane Ablanedo Larrion); Masusta-erreximenta, abertzale baten bizipenak (Arkaitz Bergaretxe Dorronsoro); eta Euskara eta biok jalgi handi mundura (Andrea Bella Garcia).
- 18:45ean, Dakit argitaletxearen aurkezpen kolektiboa: Jaiotzetik erreboltari (Matxalen Bezoz Arketa), eta Mendiak ogibide (Bingen Amadoz Ongay).
- 19:30ean itxiko ditu ateak 31. Euskal Azokak.
