Gabonetako azoka inauguratu dute
Tokiko merkatarien eta artisauen azoka gaurtik aurrera zabalik egongo da, baita izotzeko pista eta txirrista ere.
Azokaren inaugurazioan erakusketarien ordezkariak egon dira.Irungo Udala Gabonak ofizialki azaroaren 29an hasi baziren ere, gaur tokiko merkatarien eta artisauen gabonetako azoka inauguratu dute. Bertan, Cristina Laborda alkatea eta Nuria Alzaga Hiri Bultzada eta Ekonomiaren Sustapeneko ordezkaria izan dira, eta gabonak iraun bitartean zabalik egongo da Zabaltza plazan. Luis Mariano plazan eta Sarjia parkean, berriz, izotz pista eta Antzarango txirrista zabalduko dira gaur.
Aurtengo azokaren eskaintza zabala da, eta guztira 24 denda egongo dira egunotan beren produktuak saltzen. Eskulanak, kosmetikoak, bitxiak, ehungintzako produktuak, apaingarriak… erosteko aukera izango dute bertaratzen direnek. Azokaz gain, kale animazioa ere presente egongo da egun hauetan zehar. Alkatearen ustez, jarduera hauek Irun eguberri hauetarako planik onena bihurtzen dute.
Gogoan izan behar da Gabonak iragan azaroaren 29an hasi zirela ofizialki, Gabonetako argiak pizteko ekitaldiarekin, eta adin guztietako publikoentzako programazio zabala dakartela, 38 egunetan zehar banatutako 117 jarduerarekin, Udalak antolatuta. Programako jardueren artean daude honako hauek: 21 metroko gabonetako zuhaitzaren argi- eta musika-ikuskizuna, Pablo Méndez Performancesen Magic Christmas aire-ikuskizuna, Valeria Ros umoregilearen bakarrizketak eta, euskaraz, Oihan Vegarenak, kaleko animazio handiagoa, erraldoiak eta buruhandiak nagusi direlarik, San Tomas eguneko azoka, Olentzero eta Mari Domingiren etorrera eta Errege magoen desfilea.
