"Euskara zaindu, elikatu eta piztu egin behar dugu"
Euskararen Egunaren harira adierazpen instituzionala plazaratu du Hondarribiko Udalak. Euskararekiko hainbat konpromiso hartu dituzte.
Euskararen Eguna da gaur, eta Hondarribiko Udalak euskararen aldeko mezua zabaldu nahi izan du. “Euskarak bide luzea egin du. Luzeena, agian, Europa zaharrean. Eta hala ere, bere bidea ez da amaitu: bizirik dirau, hazi eta berritzen ari da”, esan dute, adierazpen instituzional baten bidez. Lau alderdiek sinatu dute adierazpena.
Debekuz beteriko hizkuntza izan da euskara, baina “isilaraztearen aurrean, hitza berreskuratu genuen”. Udalaren ustez, zaharren hizkuntza izatetik gazteena izatera pasa da euskara. “Argi-izpi berri hauekin marraztuko dugu etorkizuna. Euskararentzat aukera berriak zabalik daude. Hazi eta berritu dadin lanean ari gara”.
Udaleko politikariek azaldu dute egungo mundu nahasiak eta aldakorrak zaildu egiten duela komunitatearen indarra eta zentzua, eta hiztun komunitatea ez dela berez mantentzen, zaindu, elikatu eta piztu egin behar dela. “Zein da sekretua? Zein indar, zein ilusio izan da gure hizkuntza gaur arte ekarri duena? Milaka urte, milaka pertsona, milaka amets eta ahalegin. Norbanakoen indar isilak, belaunaldiz belaunaldi, gure hizkuntza zaharra gazte bihurtu du”.
Konpromisoak
Euskararen erabilerarako eta transmisiorako bide berriak jorratzeko unea da alderdien ustez. “Aisialditik lan munduraino, eta norbanakotik erakundeetaraino, euskaraz hitz egiteko gune erosoak sortzeko unea. Belaunaldi berrien artean euskararen transmisioa indartzeko unea”.
Horregatik, udalak hainbat konpromiso hartu ditu euskararekiko:
-
Udal politiketan euskara erdigunean jartzea.
-
Hizkuntza politikan atzera urratsik ez egitea.
-
Euskarak behar duen jauzian udalari dagokiona egitea, eta horretarako bitartekoak jartzea.
