Azaroko osoko bilkuraren balorazioa egin du EAJk
Ez da ados agertu alderdi jeltzalea onartutako aurrekontuen aurrean. Beste hainbat erabaki kritikatu dituzte, halanola bidegorriaren kudeaketa eta HAPOaren ingurukoak.
Azaroko osoko bilkuraren balorazioa egin du EAJk. Jeltzaleen ustez, bilkurak Abotsanitzen gobernatzeko era agerian utzi du. “Bilkurak aitzakietan, autokritika faltan eta Hondarribiaren etorkizunerako ikuspegi ausartik ezan oinarritutako gobernatzeko modua agerian utzi du”, azaldu dute jeltzaleek. Haien arrazoiak erakusteko, hainbat puntu nabarmendu dituzte:
Lehenik, bidegorria izan dute hizpide. Hondarribia eta Irun lotuko lituzkeen bidegorrian aurrera pausorik ez egin izana leporatzen dio EAJk Abotsanitzi. “Bere jarduna erruak banatzean oinarritu zen, hala nola Eusko Jaurlaritzari, Foru Aldundiari eta Estatuari, baina udalari dagokion partea ez zuen bere gain hartu. Abotsanitzek oposizioan zegoenean etengabeko kanpainen bidez bidegorrien aldeko diskurtsoa eraiki zuen, udala gutxi egiteaz salatuz. Baina 30 hilabetez gobernuan egon diren arren, ez dute aurrerapausorik eman arlo honetan.”.
Aurrekontuen inguruan, jeltzaleek adierazi dute proiektu “pobrea” dela onartutakoa. “Kontuak eduki gutxikoak dira, eta ez dute hiriaren garapena bultzatuko duen proiekturik”, azaldu dute. Partidei begira, hiri barruko autobusarena baloratzen dutela esan dute jeltzaleek, baina halere, aurrekontuek ez dutela ekimen eraldatzailerik. “Herritarren partaidetzaren inguruan erabiltzen den kontakizuna ez dator bat errealitatearekin: oposizioan aurrekontuaren %2 eskatzen zuten; gobernuan, %0,57 eskaini”.
HAPOaren aldaketak
HAPOaz ere mintzatu dira. “HAPOak markatuko du nola haziko den Hondarribia datozen urteetan; hortaz, gauzak ondo egitea funtsezkoa da. Hala ere, 2025eko ekainean, Abotsanitzek erabaki arduragabea hartu zuen: dokumentuan aldaketa garrantzitsuak egin zituen dagokion prozesua jarraitu gabe”.
EAJk azaldu du Abotsanitzek aldaketa esanguratsuak egin zituela HAPOan, eta ondoren, alegazioetarako epea ireki zuela, iritzia eman zezaten. “Aldi berean, dokumentu bera bidali zien beste administrazioei, baloratu zezaten, amaituta balego bezala. Eusko Jaurlaritzak adierazi du ezin duela aurrera egin alegazio epea irekita dagoen bitartean eta udalak nola erantzungo dien jakin arte. Horregatik, erantzunak egin ondoren, dokumentua berriz bidali beharko da, prozesua berriro atzeratuz”.
Azkenik, EH Bilduk eta Abotsanitzek Ertzaintzaren aldeko mozioaren emandako aurkako botoa salatu du EAJk. “Azken hilabeteetan 150 baino gehiago izan dira ertzainen aurkako gertakari eta erasoak”, esan dute jeltzaleek. Bildu eta Abotsanitz kontra agertu ziren, “polizia eredua berrikusi behar dela” argudiatuta. “Guretzat, segurtasun publikoa eta hori bermatzen duten profesionalen errespetua politika-kalkuluen gainetik egon behar dira”.
