Euskal Herriaren bilakaera historikoa biltzen duen liburua aurkeztuko dute
'Iraganaren lekuko, Euskal Herriaren historia' liburua aurkeztuko dute bihar euskararen eguneko egitarauaren harira, CBAko ekitaldi aretoan.
Liburuaren portada.Txalaparta Iñaki Lopez de Luzuriagak Iraganaren lekuko, Euskal Herriaren Historia liburua aurkeztuko du bihar, hilaren 26a, CBA liburutegiko ekitaldi aretoan, 19:00etan. Liburu honek Euskal Herriaren jatorriari buruzko hiru historialarien hitzak biltzen ditu. Lopez de Luzuriagarekin batera, Xabier Irujok eta Unai Belaustegik ere parte hartu dute narrazioan.
Euskal Herriaren ikuspegi eguneratua ematea dute xede historialariek, euskaratik egina. “Horren falta somatu dugu, askotan gaztelaniatik itzulita ematen baitira azalpenak”, adierazi du Lopez de Luzuriagak. Hori dela eta, liburuaren tonua akademikoa izango dela adostu dute hirurek.
Liburu honen aurkezpena euskararen egunarekin batera, Irungo Udalak antolatutako egitarauaren parte da. Euskararen Eguna ospatzea oso garrantzitsua dela dio, bereziki, Irunen. Euskara eguneroko kontua dela iritzi dio Lopez de Luzuriagak, euskarak eta euskal kulturak tokia behar baitute.
Liburua hiru ataletan banatuta dago. Irujok Aurrehistoriako zatia kontatzen du Goi Erdi Arora arte; Lopez de Luzuriagak liburuaren bigarren zatia kontatzen du. Alegia, 1000. urtetik Aro Garaikidera arte kontatzen du; eta bukatzeko, Frantziako Iraultzatik hasita gaur egunera arteko garapena hizpide du Belaustegik.
