Zahartzaroaz eta bakardadeaz, bihar Itsas Etxean
Zahartzaroaren eta bakardadearen inguruko ekitaldi bat egingo dute bihar Itsas Etxean. AuzoEKIN proiektua azaldu eta zahartzaroaren oztopo berriez arituko dira.
Gizon bat San Pedro kalean. AuzoEKIN proiektua “herriarena” egiteko, Zahartze berri bateruntz. Bakardadeari aurre egiteko erronkak ekitaldia egingo dute bihar, azaroaren 20an, Itsas Etxean. Zahartzaroan pertsonek egunerokoan bizi dituzten erronkak eta bakardadeak sortzen dituen oztopoak oinarri izanez, hainbat hizlari izango dira bertan. Haien artean, Javier Yanguas gerontologoak bere EL reto de la longevidad liburua aurkeztuko du.
Otsailean aurkeztu zuen udalak AuzoEKIN proiektua, bakardade ez hautatua eta hauskortasun sozialak 60 urtetik gorako pertsonen osasunean eta ongizatean duten eragin negatiboa prebenitzea eta arintzea helburu duen proiektua. Harrezkeroztik, hainbat egitasmo burutu dituzte. Lehenik, udalerriko egoeraren diagnostikoa egin zuten, eta ondoren, bertatik ateratako datuekin, auzo ezberdinetan esku hartzeak egiten hasi dira, komunitatea saretzeko hainbat ekintza eginez: kafe tertuliak eta prestakuntza saioak, adibidez.
“Hondarribian badakigu pertsonen arteko harremanak direla gure komunitatearen oinarri sendoena. Bakardadea ezkutuan geratzen den errealitatea izan daiteke, eta horregatik, beharrezkoa da guztion arreta eta parte-hartzea. AuzoEkin proiektuak bide ona erakusten ari da, baina herriak bere egitea ezinbestekoa da. Pertsonen arteko loturak sendotzea, adi egotea eta elkartasuna sustatzea dira etorkizunean eraiki nahi dugun Hondarribiaren oinarriak”, adierazi du Igor Enparan alkateak.
Biharko ekitaldian Yanguas izango da protagonistetako bat. Gerontologoa da, eta La Caixa Fundazioaren Adinekoen Programaren zuzendari zientifikoa. Geroz eta zaharragoa den gizarte batean bizi gara bere ustez, orain, urte gehiago betetzen ditugu eta. Horregatik, Yanguasen interes handiena, urte gehiago biziz, ze oztopo eta arazo sortuko zaizkigun jakitea da. Hitzaldi formatuan arituko da horretaz.
“Konpromiso osoa”
Josu Peña Gizarte zerbitzuetako zinegotziak adierazi du bakardadea ez dela norbanakoen arazoa, komunitate osoarena baizik. “Badakigu zahartzea ez dela soilik adin kontua; bizitzaren etapa oso garrantzitsua dela, erronka eta aukeraz betea. Gure adinekoak zainduko dituen eta euren beharrak entzuten dituen komunitatea izan nahi dugu. Horregatik, gaurko jardunaldiak balio handia du: elkarrekin ulertzeko nola ari diren aldatzen gure errealitatea eta gure harremanak”.
Horrez gain, Peñak gehitu du Hondarribiko Udalak “konpromiso osoa” erakusten duela bakardadeari aurre hartzeko, “sare sendoagoak eraikiz, harremanak erraztuz eta adinekoen bizi kalitatea hobetuz”, horrela “zahartzearen eta bakardadearen erronkei modu aktiboan helduz”.
