Turismoaren eragina arkitekturatik aztertzen
'Turismoaren eragina hirian' zikloaren azken saioa egingo dute bihar Kultur Etxean, eta besteak beste, turismo eredua eta etxebizitza turistikoek merkataritzan duten eragina aztertuko dituzte.
Euskal Herriko Arkitektoen Elkargo Ofizialaren Gipuzkoako Ordezkaritzako Kultura batzordeak Turismoaren eragina hirian izeneko jardunaldiak bukatuko ditu bihar, Kultur Etxean. Hiri ereduari buruzko hausnarketa zikloa da, eta 2022. urtean jarri zuen martxan EHAEOk.
18:00etan emango diote hasiera topaketari Edurne Aperribay Gipuzkoako EHAEOko lehendakariak, Azahara Domínguez Mugikortasun, Turismo eta Lurralde Antolaketako diputatuak eta Igor Enparan Hondarribiko alkateak.
Hainbat gai jorratuko dituzte, hala nola, turismo eredua, baliabideen kudeaketa eta banaketa, mugikortasun azpiegitura handien papera, saturazio egoerak, etxebizitza turistikoak eta horiek merkataritzan duten eragina… “Helburua arkitekturatik eta hirigintzatik ekarpenak egitea da, fenomeno horiek hirian duten eragina hobeto ulertzeko”, adierazi du EHAEOk ohar bidez.
Gai horietaz hitz egiteko, hainbat pertsona igoko dira oholtzara. David Bravo arkitekto hirigilea, Enrique Antolin soziologian doktorea, Estitxu Urtizberea Hondarribiko Udaleko Lurralde Antolamendu eta Hirigintza zinegotzia eta Libe Otegui Gipuzkoako Foru Aldundiko Turismo zuzendaria izango dira bertan. “Hitzaldiek begirada teknikoa eta osagarria eskainiko dute, bakoitza bere arlotik”. Ondoren, hizlarien eta publikoaren arteko solasaldia izango da, Mikel Azkona arkitekto doktorea hondarribiarrak moderatuta.
Sarrera doakoa izango da, baina plazak mugatuak daude. Sarrera lortzeko, Gipuzkoako EHAEOren atarian daude eskuragarri.
