Sute arrisku, eta haize ufada bortitzengatik abisu horia
Gaur eguerdiaz geroztik dago ezarria abisu horia baso suteen arriskuagatik bihar, asteazkena, 23:59ra arte. Mendialdeko haizeguneetan zein haizeguneak ez direnetan, biharko eman du abisu horia Euskalmetek.
Hazieteak eragindako kalteak artxiboko irudian. Irungo Udaleko Segurtasun eta Bizikidetza arloak jakinarazi du abisu horia ezarri dutela gaur eta bihar. Baso suteen arriskuagatik ezarritakoa gaurtik, biharko 23:59ra izango da indarrean; haize ufada bortitzengatik izango da indarrean bihar mendialdeko haizeguneetan abisu horia egun osoan, eta haizeguneak ez diren eremuetan, 06:00etatik 11:59ra eta 18:00etatik 23:59ra.
Euskalmetek emandako gomendioak zerrendatu ditu udalak eta aintzat hartzeko eskatu die herritarrei. Gomendioak, ondokoak: ateak itxi eta leiho eta toldoak finkatzea; loreontziak eta kalera eror daitekeen objektu oro barrura sartzea; aipatutako orduetan mendira ez joatea eta behar beharrezkoa bada, dagozkion neurriak hartzea; erlaitz horma eta zuhaitzetatik eta publizitate hesietatik urrutiratzea eta lanak egiten ari diren edo egoera txarrean dauden eraikinen aurrean neurriak hartzea; aldamio eta garabiak eta lanak egiteko beste elementu batzuk finkatzea; errepidetik ez bidaiatzea ahal dela, eta dagokion neurriak hartzea; haize zakarrak sortzen dituen itsasaldi eta olatuetatik urrutiratzea; itsasontzirik ez erabiltzea eta amarrak finkatzea; eta ur kiroletan ez aritzea.
Irungo babes zibilak, gainera, jakinarazi du arreta emango duela ondoko egoeretan: Garabi luma bidezko eraikuntza obrak; teilatuak eta edo terrazak, estalkiak eta abar eraberritzeko obrak; ageriko eremuetarako obrak; jendearentzako agertokia eta karpa duten ekitaldiak; jende kontzentrazioak ageriko eremuetan; ostalaritzako konkurrentzia publikoko terrazak; eraikin abandonatuak edo erdi abandonatuak; egoera txarrean dauden hormak eta erortzeko arriskua dutenak; egoera txarrean dauden eta erortzeko arriskua duten estalkiak; kanpoko publizitate kartelak; zuhaitz eremuak; eta barbakoa eremuak.
Bide batez, udalak gogorarazi du SMS bidezko zerbitzua eskaintzen duela Udaltzaingoak muturreko eguraldiagatik edo larrialdiren bat dagoenean abisua emateko. Zerbitzua doakoa da, eta izena ematen dutenek mezua jasotzen dute mugikorrean larrialdi bat dagoenean: euriteak, haizeteak, hotz boladak, elurteak, baso suteak, gai kimikoen edo salgai arriskutsuen istripuak edo bestelakoak.
Alerta larria den kasuetan, SMS abisuak automatikoki igorriko direla jakinarazi du, “baita izena eman ez dutenei ere” arrisku eremuan erroldatuta dauden eta udalaren informazio sisteman sakeleko telefonoa erregistratua duten pertsona guztiei. SMS bidezko sisteman izena emateko klik hemen.
