Sarek eta Etxeratek "behin betiko konponbide bat" eskatu dute
Hilabeteroko azken ostiralean egindako irakurketa zabaldu dute, eta bihar, Zabaltza plazan izango dira, 20:00etan.
Hilabeteroko irakurketa zabaldu dute Sarek eta Etxeratek. “Urriko azken ostiral honetan ere badugu zer esan eta zer hausnartu, herri honetan bizitako gatazkak utzi dizkigun ondorioen konponbideari dagokionean, pasa den asteburuan Sarek Bilboko Euskalduna Jauregian antolatutako II. Konferentzian ikusi eta entzun genuen moduan”, adierazi dute, ohar bidez. Horrez gain, bihar hilabeteroko elkarretaratzea egingo dute, 20:00etan Zabaltza plazan.
Bi erakundeen ustez, “ezin da gehiago luzatu”. Duela ia 15 urte utzi zuen ETAk bere jarduera, eta Sareren eta Etxeraten ustez, “oraindik orain, ondorio barzuk korapilatuak jarraitzen dute”. Haien ustez, Euskal Herriko bake prozesua bestelakoa izaten ari da, beste herrialde batzuetan sufrimendua eragiten zuten ondorioak jarri zirelako, ez hemen bezala. “Borondate politikoa behar da behin betiko konponbide bat emateko. Eta urratsak denok eman behar ditugu. Oinarri politikoak dituen gatazkak konponbide eta borondate politikoak behar ditu”.
Egun, zigorrak betetzen ari diren 125 euskal presoetatik 66 dira zigorrak erregimenak kalean betetzen ari direnak. Halere, bi erakundeek adierazi dute preso, iheslari eta deportatuen auziak konponbide azkar bat behar duela, eta orain erregimen itxian daude presoen kopurua txikiagoa izan beharko lukeela. “Beste edozein arrazoirengatik espetxean dagoen edozeini aplikatzen zaizkion lege eta espetxe politikak aplikatu beharko liratekete euskal presoen kasuan”.
Sareren eta Etxeraten ustez, euskal presoei aplikatzen zaien salbuespen lege eta espetxe politika horrek “sufirmendu izugarria” eragin du presoengan eta haien familiengan. Horren adibide bezala Jakes Esnalen kasua aipatu dute. 32 urte eman ditu Esnalek preso, eta orain askatu dute. “Haren familia eta lagunei gure babesa eta maitasuna adierazi nahi genieke”. Babes hori oraindik erbestean jarraitzen duten hamalau iheslari eta hiru deportatuei luzarazi diete.
Biktimen papera
Familiek eta presoek duten sufrimendua amaitzeko beharra dago haien ustez, “konponbidea, bakea eta elkarbizitza behar bat dira eta gure herriarentzat”. Horrez gain, aipatu dute egindako konferentzian biktimen papera garrantzitsua izan zela. “Biktima guztien egia, aitortza, erreparazioa eta ez errepikatzeko bermea. Elkarbizitzara jauzi egiteko ezinbestekoak”. Harresiak zeuden tokian, zubiak eraiki behar direla uste dute, “herriaren elkarbizitzaren alde” egiteko.
Urtarrilean manifestazioa egingo dute Bilbon, 10ean, eta bertara hurbiltzeko gonbita zabaldu dute, “berriz ere milaka izan gaitezen herritar aktibo, elkarbizitzaren, bakearen zein preso, iheslari eta deportatuen etxeratzearen aldeko auzolan erraldoian”.
