Herritarren Arreta Zerbitzua "bikain" baloratzen dute herritarrek
HAZen inguruko inkestak egin ditu udalak, eta azaldu dute emaitzen arabera herritar gehienek bisita bakar bat behar izaten dutela haien arazoa konpontzeko.
HAZ, Irungo Udaleko artxiboko argazki batean. Irungo udalak HAZ Irungo Herritarren Arreta Zerbitzuko erabiltzaileei inkesta bat egin die, 450 lagunei zehazki, eta iragarri dute %97ak bisita bakar batean ebazten dutela haien kontsulta. Balorazioa “bikaina” dela esan du udalak, eta herritarrak “pozik” daudela zerbitzuarekin. 5 puntutik 4,75 lortu ditu HAZek, orokorki, eta udalak azaldu du etengabe daudela lanean, zerbitzua ahalik eta hoberen emateko.
Herritarren balorazioa jakitea ezinbestekoa da udalarentzat. “Inkesta horiek aldian behin egiten dira, eta aukera ematen digute herritarrek eskainitako arretaren eta funtzionamenduaren inguruan zer pentsatzen duten jakiteko. Herritarrek eskura dituzten kanal guztiei buruz galdetzen da: aurrez aurreko arreta, 010 telefonoa, webgunea eta autozerbitzuko terminalak”, adierazi du udalak ohar bidez. Batez beste, HAZek egunean 330 dei jasotzen ditu, eta erabiltzaileek zerbitzu horri 5 puntutik 4,6 eman diote.
Aurrez aurreko arreta zerbitzuak jaso du iritzi onena, 5etik 4,83. Kopuruak begiratuta, batez beste hilean 5.000 herritar hurbiltzen dira HAZen bulegoetara, eta ia 8.000 izapide egiten dira, 380 egunean, batez beste. “Aurrez aurreko zerbitzu honen alderdi positiboak identifikatzean, inkestatuek jasotako arreta eta adeitasuna, arretaren azkartasuna eta eraginkortasuna eta emandako laguntza nabarmendu dituzte”. Baina badira hobetzeko alderdiak ere. Badira baliabide gehiago eskatzen dituztenak, edota egun daudenak hobetzea, baina udalak nabarmendu du inkestatuen erdiak baino gehiagok ez duela hobekuntzarik behar.
Izapideentzako erraztasunak
Autozerbitzuko terminalak ere baloratu dituzte inkestatuek. 4,88 puntu lortu dituzte, eta jendea “pozik” dago haien lanarekin. Ia 5.000 izapide kudeatzen ditu hilean terminalen sareak. “Inkestatuen % 70ek esan du inprimagailurik ez daukalako jotzen duela autozerbitzuko terminaletara, eta % 1ek, ordenagailurik ez daukalako. Beraz, agerian geratzen da herritarrentzako zerbitzu erabilgarria dela. Izapiderik ohikoena, alde handiz gainera, erroldako ziurtagiriak eskatzea da, eta, atzetik, ordainagiriak eskatzea eta ordainketak egitea”.
Beste hainbat arlo baloratu ditu inkestatu bakoitzak:
- Aurretiazko hitzorduak: 4,96
- Izapideak: 4,92
- Langileen ezagutza maila, arreta denborak, erantzunaren zehaztasunak eta itxaron denborak: 4,76
- Galdutako objektuen zerbitzua: 4,90
- HAZera joateko aurretiazko hitzordua: 4,79
- Udalari eta hiriari buruzko informazio orokorra: 4,66
