Euskal Herriko Maratoi Erdia, igandean
3.700 korrikalarik egingo dute igandean Donibane Lohizune eta Hondarribia arteko 21.097 metroko bidea. Helmuga, Kale Nagusian.
Donibane Lohizune-Hondarribia lasterketa, edo Euskal Herriko Maratoi Erdia, igandean (hilaren 26an) izango da. 26. ekitaldia izango da aurtengoa. Hondarribia Kirol Elkarteak eta Ur Jokok antolatutako lasterketako dortsalak aspaldi agortu zirela, 3.700 partaide izango ditu 21.097 probak denera. 10:00etan aterako dira korrikalariak Donibane Lohizuneko Folch plazatik, eta Lapurdiko kostaldetik Hendaiaraino iritsi, handik Irunera pasa, eta Hondarribiko Kale Nagusian bukatuko dute bidea lasterkariek.
Maratoi erdiaren ondorioz trafikoan eta garraio publikoan eragozpenak izango dira igande goizean zehar Irunen eta Hondarribian. Horien berri izateko joan Hondarribiko eta Irungo udalen webguneetara (hondarribia.eus eta irun.org).
Iazko sailkapena kontuan hartuta, gizonen kategoriako lehen korrikalariek ordubete eta 10 minutu baino beheragoko denbora egin dezakete, iazko irabazleak (Unai Arroyo) 1.08.14ko denbora egin zuelako; emakumeetan, iaz, Mylene Da Costa izan zen azkarrena, 1.22.17 denborarekin. Beraz, Hondarribiko Kale Nagusiko helmugara gizonak 11:05etik aurrera iristen has daitezke, eta emakumeak 11:15etik aurrera.
Korrikalariek euren motxilak irteera puntuan utz ditzakete lasterketa hasi baino (10:00etan hasiko da) ordu erdi lehenagora arte. Auto bidez helmugara eramango dituzte partaideen motxila eta poltsa horiek.
Dortsalak jasotzeko hainbat aukera erraztu ditu antolakuntzak. Izan dira zuzenean etxean jaso dutenak. Edonola ere, dortsalak aurrez aurre jasotzeko hautua egin dutenek bi gunetan jaso ditzakete (korrikalariek izena ematerakoan hala aukeratuta). Honakoak dira dortsal-jasotze guneak
Donibane Lohizunen, Urdazuri kirolgunean:
- Hilak 24, ostirala: 15:00etatik 19:30era.
- Hilak 25, igandea: 10:00etatik 19:30era.
Hondarribian, Jostaldi pilotalekuan:
- Hilak 24, ostirala: 18:00etatik 20:00etara.
- Hilak 25, larunbata: 11:00etatik 13:30era, eta 16:00etatik 18:30era.
