Osasun Bidasoa Plataforma: "Osakidetzak oraindik ez ditu bete pediatriako arreta eredu berria ezartzeko agindu zituen neurriak"
Apirilaren 13an itxi zuen Osakidetzak Bidasoako Ospitaleko pediatriako larrialdi zerbitzua. Ordutik sei hilabete igaro diren honetan, agindutakoak bete gabe jarraitzen dutela salatu eta betetzeko eskatu du plataformak.
Bidasoa eskualdeko haur urgentziak itxi zirenetik sei hilabete igaro dira eta Osakidetzak pediatria arreta eredu berria ezartzeko neurriak agindu zituen arren, egun bete gabe jarraitzen duela salatu du Osasun Bidasoa plataformak.
Zehazki, apirilaren 13an itxi zuen Osakidetzak Bidasoako Ospitaleko pediatriako larrialdi zerbitzua. 36 urtez 100.000 biztanle inguru artatu zituzten. 2012. urtera arte ospitaleko pediatren talde batek artatzen zituen larrialdiak. Ondoren, “osasun murrizketen testuinguruan”, ospitaleko pediatria zerbitzua ixtea eta osasun zentroetako pediatrek ospitaleko larrialdiak “estaltzera behartzeko” erabakia hartu zuen Osakidetzak.
“Egoera hori bakarra izan zen Osakidetzan eta porrot handia izan zuen”, azaldu dute plataformako kideek. “Lehen arretako pediatrek euren kontsultak uztartu behar zituzten ospitaleko guardiekin, eta horrek profesionalen etengabeko ordezkapena ekarri zuen, baldintza hobeak eta lan-baldintza egokiagoak zituzten beste eskualde batzuetara joanez”.
Egora hori zelarik, duela sei hilabete, Osakidetzak haur arretaren kalitatea hobetzeko konpromisoa hartu zuela gogoratu du Osasun Bidasoa Plataformak. Zehazki, “pediatren arreta-ordutegia luzatzeko (astelehenetik ostiralera 8:00etatik 15:00etara izatetik 8:00etatik 17:00etara) eta Irun Zentroko osasun zentroko larrialdietan (PAC) pediatra batek arreta emateko konpromisoa hartu zuten (astelehenetik ostiralera 17:00etatik 22:00etara, eta larunbat eta jaiegunetan 9:00etatik 22:00etara)”.
Horiek bermatu ez eta egungo egoera eredua haurren segurtasunerako “arriskutsua” dela uste du plataformak: “pediatra falta da osasun zentroetan, ez da betetzen 08:00etatik 17:00etara bitarteko ordutegia (irailaren amaierara arte zenbait egun bakarrik luzatu zen pediatren egutegia eta familia medikuek artatu behar izaten dituzte haur larrialdiak), eta ez da pediatrarik egon Irun Zentroko PACean”. Zentzu horretan, gaixo larri bat Donostiako ospitaleko larrialdietara garaiz ez heltzeko “arrisku handia” dagoela uste dute.
Osasun Bidasoak maiatzean deitutako manifestazioan 12.000 herritar inguruk parte hartu zuten, eta deitoratu dute “ez osasun sailak ez osakidetzak ez dute informaziorik eman hurrengo hilabeteetan egoera hobetuko duenik pentsarazteko”. Hori horrela, Bidasoako Ospitalean pediatria larrialdiak berriro irekitzeko eta zerbitzua ospitaleko pediatrek artatua izateko eskatu dute.
Beste “gabezia larriak”
Osasun Bidasoa plataformako kideek, aldi berean, Bidasoa Ospitalean beste zenbait gabezia larri daudela salatu dute.
- Haurren eta gazteen psikiatria: “Irailaren amaieran haur-psikiatra bat sartu zen, baina bigarren psikiatra-plaza ez da bete. Laguntza ematen zuen psikiatria-erizainari kontratua kendu zaio. Ez dago administrazio-laguntzarik, ezta hezkuntza-zentroekin koordinaziorik ere”.
- Bidasoako Ospitaleak ez du urologia-zerbitzurik: “Behar diren 4 urologoetatik, egun 2 bakarrik daude, gainera %50eko dedikazioarekin eta Donostiako ospitalearekin partekatuta. Beste ospitale batzuetako urologoek ordu estrak egiten dituzte arratsalde batzuetan. Ez da ebakuntzarik egiten, eta paziente askok zain jarraitzen dute”.
- Zainketa zerrendak “faltsutzen” dira: “Hilabeteak daramatzate traumatologia, kirurgiako eta oftalmologiako kontsultetarako txartelak atxikitzen, pazienteak benetan zain ez daudela ager dadin”.
- Zainketa zerrendak “handitzen” ari dira: “Besteak beste, neurologia, pneumologia, mina-unitatea, errehabilitazioa eta otorrinolaringologia zerbitzuek itxaron-zerrenda luzeak dituzte”.
- Lehen arretako obrak atzeratzen ari dira: “Irun Zentroan 2020ko uztailaz geroztik barrakoietan jarraitzen da. Alarde kaleko eraikin bat prestatzea agindu da, baina ondoen jota 2026 amaieran egongo da erabilgarri. Ez da ezagutzen noiz hasiko diren Oinaurren hirugarren anbulatorioa eraikitzeko lanak”.
- Ez dira hasi ebakuntza gela berrien obrak: “Duela urtebete itxi zen ospitaleko bigarren solairuko ospitalizazio-unitatea, eta 21 ohe galdu ziren. Ospitalearen ondoan modulu-eraikin bat eraiki zen, baina hilabeteak daramatza erabilera gabe. Ez dago datarik ebakuntza-gela berrien lanak hasteko”.
