Hondarribiko Farfailarien VII Topaketa, igandean
300 farfailari inguru biltzea aurreikusi dute Emeki Emakume Elkarteko Ehoiziriko taldeko kideek. Hondarribiko Jostaldi pilotalekuan izango da hitzordua 10:00etatik 14:00etara.
Hondarribiko Farfailarien VII Topaketa. Igande honetarako (hilak 19) Hondarribiko Farfailarien VII Topaketa antolatu du Emeki Emakume Elkarteko Ehoiziriko taldeak. Iaz bezala Hondarribiko Jostaldi pilotalekuan 300 farfailari inguru biltzea aurreikusi dute antolatzaileek. Goizeko 10:00etan hasi eta 14:00ak arte iraungo du topaketak.
Frontoian zehar hainbat saltoki jarriko dituzte eta parte hartzaileek beraien lanak egiteko material ezberdinak erosteko aukera izango dute. Ekitaldiaren amaieran saltoki ezberdinek emandako opariak zozketatuko dituzte parte hartzaileen artean.
Gisa honetako topaketak aukera ona izaten dira inguruko herrietako farfailariak elkar ezagutzeko, pieza ezberdinak ikusteko, eta egiteko moduak elkarbanatzeko. Ezkontzako zapiak, abanikoak, xalak, mantoiak… eta beste hainbat gauza egin daitezke josteko teknika horren bidez. Bakoitzak azken hil edo asteetan esku artean izan duen pieza ekartzen du topaketara.
Gainera, topaketak aproposak izaten dira hurrengo lanak zein izango diren erabakitzeko. Ideiak hartu eta patroi zein hari berriak erosten dituzte. Hala azaldu zuen iaz Emeki elkarteko Kontxi Galardik Hitzak egindako erreportaje batean.
