Etxeko animalien ordenantza berria prestatuko du udalak
Udal gobernuaren ustez, orain indarrean dagoena "zaharkitua" dago, eta beraz, aldatzeko beharra dago.
Txakur bat, artxiboko irudian. Etxeko animalien ordenantza berriaren prozesuari ekin dio Hondarribiko Udalak. Animalien babesa, ongizatea eta edukitze arduratsua arautuko ditu ordenantza berriak. Udalaren ustez, egun indarrean dagoen ordenantza “zaharkitua” geratu da, “beste testuinguru sozial eta juridikoan” onartu zen eta. Horregatik, eta udalaren adierazi duenez, geroz eta herritar gehiagok etxean animalia dutelako erabaki dute ordenantza berriari bidea irekitzea.
Lehenengo, aurre kontsulta publikoa egingo dute. Azaroaren 7ra arte, herritarrek araudi berriak jorratu beharko lituzkeen alderdiei buruz haien iradokizunak aurkezteko aukera izango dute. “Aurre kontsulta publikoaren xedea parte hartzea eta gardentasuna sustatzea dira, eta interesa dutenek haien iradokizuna web orriko Gardentasun Atariaren bidez aurkeztu ahalko dute”, adierazi du udalak ohar bidez.
Udalaren ustez, nabarmen handitu da etxeko animalien kopurua herrian, eta horrek erronka berriak ekarri ditu. Erronka horiek herritarren bizikidetzarekin, espazio publikoetako higienearekin eta animaliekiko tratuarekin zerikusia dute. “Orain arte legean jasotako arauek zailtasunak sortzen dituzte Udaltzaingoaren eta udal zerbitzuen jardunean, eta segurtasun juridiko falta eragiten die animalien jabe eta edukitzaileei”.
Segurtasuna “areagotu”
Sergurtasun juridikoa areagotu nahi du udalak, “animalien identifikazioari, jabeen betebeharrei, espazio komunen erabilerari eta arau hausteen kasuan aplikatuko den zehapen araubideari buruzko arau argiak” ordenantza berrian ezarriz.
