Vila Bira martxa zikloturistaren laugarren ekitaldia, igandean
2283 metroko desnibela izango duen 115 kilometroko martxa burutuko dute hilaren 12an. Haurren lasterketa, berriz, larunbatean izango da.
Igande honetan Vila Bira martxa zikloturistaren laugarren ekitaldia burutuko dute. Aurtengo ibilbidea nahiko exijentea izango da; izan ere, 2283 metroko desnibela izango duen 115 kilometroko martxa antolatu dute iganderako.
Txirrindulariak goizeko 08:30ean irtengo dira Hondarribitik eta iparraldeko herri politetan zehar murgilduko dira. Ordu horretan bizilagunek adi egon beharko dute 45 minutuz errepidea mugatuta (inoiz ez itxita) egongo baita Biteri kaletik Jostaldi eremuraino.
Partaidetzari begiratuta hegoaldeko euskara entzuteaz gain, iparraldeko euskara ere entzuteko aukera izango dela adierazi du Josetxo Berasategi antolatzaileak. %50a iparraldeko txirrindulariak izango dira. Aldi berean, kopuru totalaren ehuneko handi bat emakumeak izango direla zehaztu du ere. “Emakumearen ahalduntzea programaren barruan gaude, hori izan baita beti gure helburuetako bat. Aurten %2 igo dugu partaidetza. Gutxi gorabehera 100 bat emakume egongo dira aurten Vila Biran”.
Berasategik argi utzi duenez, martxa honek ez du lehiakortasun kutsurik izango. “Lagunekin ateratzeko, eguna ondo pasatzeko eta eguraldia lagun bista politak izateko martxa da”, adierazi du. Hori bai, segurtasuna bermatzeko bizikleta kasko homologatua eramatea beharrezkoa izango da.
115 kilometroak burutzerakoan elkarrekin, bazkari goxo batez gozatzeko aukera izango dute parte hartzaileek, era horretan haien sentsazioak modu sosegatu batean partekatzeko tartea izango dute. Informazio gehiago Vila Biraren webgunean aurki daiteke.
Lupe Queiruga Kirol zinegotziak, udalaren partetik, eskerrak eman dizkie Vila Biraren antolatzaileei “lehiakortasunean oinarrituta ez, baina osasunaren alde” egiten duen halako proba bat antolatzeagatik. “Oso garrantzitsua da kirola aisialdi moduan ere ulertzea. Kirola ez delako soilik modu lehiakor batean aritzeko tresna, osasun fisikoa lantzea ere du helburu”, adierazi du zinegotziak.
Vila Biraren patrozinatzaile nagusia Natur Klima Fundazioa izango da bigarren urtez segidan. Martxa zikloturistaren balioekin bat egitenaz gain, jasangarritasuna defendatzen duen fundazioa da eta horregatik standean kontainer txiki bat ezarriko dutela azaldu du Xabier Esteban fundazioko ordezkariak.
“Nahi dutenek maillot erabiliak edota erabiltzen ez dituztenak guri emateko aukera izango dute. Era horretan guk bigarren bizitza bat eman ahal izango diegu upcycling deitzen den prozeduraren bitartez”. Aurtengo Vila Biraren maillotak, adibidez prozedura horren bitartez sortu dira.
Txikienek, aldiz, larunbat goizean izango dute bizikleta gainean elkarrekin aritzeko aukera. Goizeko 11:30ean hasiko da Vila Bira txiki, eta Muliatetik Biteri eraikinera zenbait buelta emango dituzte.
Ibilbidea
1º Portua: Lizuniaga (km 29,5): Altuera: 219 Distantzia: 4,3 Desnibela: 176 Media: %4
2º Portua: Lizarreta (km 45): Altuera: 442 Distantzia: 7,4 Desnibela: 345 Media: %4,66
3º Portua: Agiña ( Km60) Altuera: 550 Distantzia: 8 Desnibela: 475 Media: %5,94
4º Portua: Aritxulegi ( Km78) Altuera: 479 Distantzia: 3,45 Desnibela: 192 Media: %5,57
5º Portua: Jaizkibel ( Km98) Altuera: 453 Distantzia: 8 Desnibela: 444 Media: %5,54
