Trafiko mozketak eta Irunbus zerbitzuan aldaketak, bihar gauean
Bebe eta Ayshak kontzertuak emango dituzte bihar, 21:00etan, San Juan plazan; ondorioz, zenbait aldaketa iragarri dituzte trafikoan.
Bihar gauean kontzertua emango dute Bebe eta Ayshak Irungo San Juan plazan, eta, horren harira, jakinarazi dute hiriko zenbait eremutan trafiko mozketak eta Irunbus zerbitzuan aldaketak izango direla. Izan ere, hiriko erdialdera sarbidea itxita egongo da, eta trafiko Junkal kalera desbideratuko dute. Era berean, San Juan plazako taxi geltokia gaituta egongo dela nabarmendu dute. Alabaina, argitu dute murrizketa horiek bertan behera geratuko direla kontzertuko eremua garbitu eta “herritarren segurtasuna bermatu ahala”.
Horretaz gain, Mugikortasun Jasangarriko arloak aipatu du Irunbus zerbitzuko aldaketak, gutxi gora behera, 21:00etatik 01:00etara izango direla. Hala ere, hona hemen informazio zehatza:
- L1. Zaisa – ospitalea.
- Aldaketarik gabe.
- L2. San Juan – Katea – Txingudi.
- Aldaketarik gabe.
- L3. San Juan – Artia – Olaberria.
- Aldaketarik gabe.
- L4. San Juan – Anzaran – Olaberria.
- 20:45eko irteeratik hasi eta zerbitzuaren amaiera arte San Juan Langile eta Urdanibia plazako geltokiak bertan behera geratuko dira. Gainera, San Martzial kalea 21:00etatik 01:00era egongo da moztuta, eta autobusa Euskal Herria hiribidetik joango da.
- Gautxoria.
- 23:00etatik 01:00era, Urdanibia plaza, Nafarroa 4 eta Nafarroa 13ko geltokia desgaituta egongo dira.
