Eman daiteke izena Beldur Barik lehiaketan
Lehiaketaren 11. edizioa da aurtengoa, eta azaroaren 9ra arte dago parte hartzeko aukera. 12 eta 20 urte artekoek har dezakete parte.
Beldur Barikeko aurkezpeneko irudi bat. Irungo Udaleko Berdintasun sailak jakinarazi duenez, martxan da Beldur Barik ikus entzunezko lehiaketaren 11. edizioa. 12 eta 20 urte arteko gazteek har dezakete parte bertan, eta horretarako azken eguna azaroaren 9a izango da, 23:59an itxiko baita epea.
Lehiaketaren helburua indarkeria matxistan oinarritutako jokabideak eta jarrerak prebenitzea da, bai eta “gazteek beren bizitzen esparru guztietan, eguneroko testuinguruetan eta eremuetan identifikatzen dituzten desberdinkeriaren ondorioz jasaten dituzten indarkeria matxistaren adierazpideak ikusaraztea “.
Ikus entzunezko pieza horiek, gehienez, hiru minutuko iraupena izango dute, kredituak barne. Lanak, bestalde, euskaraz edota gaztelaniaz aurkez daitezke; hots, baita bi hizkuntzetan ere, betiere azpitituluak euskaraz edo gaztelaniaz badaude. Halaber, antolatzaileek ohartarazi dute “oso aintzat” hartuko dutela euskararen erabilera.
Bideoak epaitzeko garaian, nabarmendu dute “mezuak nesken ahalduntzeari eta mutilen matxismoaren aurkako konpromisoari lotutako hausnarketak eta eztabaidak sorrarazteko duen gaitasuna” baloratuko dutela.
Lehiaketa bi kategoriatan banatzen da: lehen kategorian 12 eta 16 urte arteko haurrek hartuko dute parte (2009-2013 artean jaiotakoak), eta, bigarrenean, berriz 17 eta 20 urte artekoek (2005-2008 artean jaiotakoak).
Kategoria bakoitzeko irabazleak 400 euroko saria jasoko du, eta aurkezten den bideo bakoitzari 100 euro emango dizkiote.
Hona hemen lehiaketaren xehetasun eta oinarri guztiak.
