Done Jakue bideko mugarri bat jarriko dute Irunen
"Laster" jarriko dute mugarria hirian. Alabaina, gaurtik igandera bitartean Done Jakue bidearen lagunen elkarteen topaketa egingo dute.
Berriki jakinarazi dutenez, Irunen Done Jakue bideko mugarri ofizial bat instalatuko dute Iparraldeko bidearen hasieran, hori baita hiritik abiatu eta Santiago de Compostelaraino iristen den bidea. Hirian jarriko duten ikurra [ikus beheko irudia] granitozkoa da, tona erdi pisatzen du, eta ‘842km’ jartzen du, hori baita Irun eta Santiago de Compostelako katedralaren arteko distantzia.
Aipatu dutenez, ikur hori Abenida zubitik gertuen dagoen lorategian jarriko dute, Santiagoko mugaren ondoan, alegia. Era berean, jakinarazi dute piezak aurrealdean bi sinbolo nagusi dituela, gezi horia eta bieira maskorra, hurrenez hurren, bigarren hori bide ofizialerantz orientatuta.
Ikur hori hirian jartzea Done Jakue bidearen sinboloak munduan nazioarteko programaren parte da, hori “leku berezietan mugarriak jartzeko eta bidearen proiekzio kultural eta turistikoa handitzeko egitasmoa” baita. Gainera, azaldu dute Irunen errekonozimenduak “balio berezia” duela, Iparraldeko bidearen abiapuntua baita.
Cristina Laborda, Irungo alkatea: “Egitasmo horren bidez, udalak kultur sustapenarekiko eta turismo jasangarriarekiko konpromisoa azpimarratu nahi ditu, baita milaka urteko ondare bat kontserbatu eta ezagutarazteko apustua egin ere. Jende askok ematen du hemen Santiago de Compostelara iristeko lehen pausoa”.
Ildo beretik, alkateak gehitu du bisitariek “bultzada aipagarria” ematen dietela bertako ekonomiari, ostalaritza, merkataritza eta zerbitzuak dinamizatzen baitituzte eta “Irun hiri abegitsu eta irekia dela nahiz kultur ondarearekin konprometituta dagoela proiektatzen baitu”.
Done Jakue bidearen lagunen elkarteen topaketa
Asteburu honetan, gainera, Done Jakue bidearen lagunen elkarteen urteroko topaketa egingo dute Irunen, eta jakinarazi dute 120 ordezkari baino gehiago bilduko direla hirian. Topaketari hasiera gaur (hilak 10) emango diote, 18:00etan, Ficoban, eta igandera bitartean zenbait jarduera egingo dituzte, hitzaldiak, tailerrak eta bisitak, kasu.
