Aniztasunaren Galaren bosgarren edizioaren lekuko izango da Oiasso
Hilaren 17an (ostirala) izango da hitzordua, eta musika, dantza eta antzerkia ardatz izango dituen ekitaldia egingo dute Oiasso museoan.
Oiasso museoan egingo dute aurten Aniztasunaren Galaren bosgarren edizioa, Chillida Leku eta Topic museoekin batera. Sormen artistikoa “ezberdintasunetik” ospatzeko helburuarekin egingo dute ekitaldia, eta hilaren 17an (ostirala) egingo dute Irunen, 19:00etan.
Aizpea Goenaga Oiasso museoko zuzendariak eta galaren zuzendariak adierazi duenez, jarduera horrekin “artista anitzen sorkuntzarako topagune berriak” eskaini nahi dituzte, eta hori gauzatzeko Gipuzkoako Foru Aldundiaren laguntza izan dutela nabarmendu du.
Bosgarrenez egingo dute gala hori, eta aurtengoan Iñaki Salvador galako musika zuzendaria, Jakes Txapartegi, Simon Ezquiaga, Esther Barandiaran, Teatro Magicising, Uikan Dantza Taldea eta Ezezagunok-ek hartuko dute parte.
Emma Larreta izango da ekitaldiaren gidaria, eta artista guztien gaitasun sortzailea partekatu, parte hartu eta gozatzera gonbidatzen duen programa bat onduko du. Noski, ekitaldiaren ardatz nagusiak musika, dantza eta antzerkia izango dira.
Hitzordura bertaratzeko sarrerak eskuratu behar dira, eta museoan bertan daude salgai, bost euroan.
