Zenbait jarduera antolatu dituzte astebururako Ernai eta Sortuk
Ikasturteko aurkezpena eta mendi martxa antiespañolista dira, besteak beste, datozen egunetan egingo dituzten jarduerak.
Irungo Ernaiko kideak, iazko talde argazki batean. Ernaik eta Sortuk zenbait jarduera antolatu dituzte asteburura begira. Batetik, larunbatean, hilaren 11n, aurkezpenak egingo ditu Ernaik Irun eta Hondarribian Muara eta Hazia kultur elkarteetan. 11:30 eta 17:00etan izango dira hitzorduak, eta gazte antolakundearen azken urteetako jardunaren errepasoa egiteaz gain, ikasturtea aurkeztu eta hasiera emango diote hari. Muarako aurkezpena 11:30ean izango da, eta Haziakoa, berriz, 17:00etan.
Bestalde, hispanitatearen egunean, hilaren 12an, alegia, San Martzialera egingo dute mendi martxa Ernaik eta Sortuk. 10:00etan abiatuko dira Moskutik, eta 12:00etan ekitaldia egingo dute San Martzialen. Azkenik, 14:30ean, bazkaria egingo dute Hazia Kultur Elkartean.
Antolatzaileek jakinarazi dute antiespañolismoa “erdira” ekarri nahi dutela Ernai eta Sortuk, eta xede horrekin antolatu dutela egitaraua. Gainera, azpimarratu dute adin guztietako jendeari luzatu nahi dietela ekintzetara bertaratzeko deia. Zehazki, “espainiar estatu zapaltzailearen aurrean indarrak batu eta igandekoa bezalako jai egun arrotzak salatu eta horiei aurre egiteko deia” egin dute. Are, azpimarratu dute “ez direla espainolak eta beraz, Euskal Herri aske, sozialista eta feminista” dutela ipar.
Igandeko bazkariko txartelek 10 euroko prezioa dute, eta Hazian erosi behar dira tabernaren ohiko ordutegian. Hala ere, tabernara joaterik ez duen inor balego Ernaiko kideekin sare sozialen bidez harremanetan jartzeko eskatu dute. Era berean, intolerantziak dituenak ere bide beretik abisatu behar du.
