Irungo laguntza Ruandan, Paraguaien eta Kolonbian
Behar Bidasoa gobernuz kanpoko erakundeak Irungo Udalaren dirulaguntzak erabiltzen ditu munduan zehar proiektu ezberdinak gauzatzeko.
Kabuga (Ruanda) herriko zubi bat, konpondu ondoren. Behar Bidasoa gobernuz kanpoko erakundeak iragarri du hainbat proiektu garatuko dituela munduan zehar Irungo Udalak baliatutako diru laguntzarekin. “Urteak daramatzagu lankidetza egonkorra izaten Irungo Udalarekin, nazioarteko esku- hartzeetan jarraitutasuna eta iraunkortasuna bermatzeko”, adierazi du Behar Bidasoak. Hiru herrialdetan egingo dituzte esku hartzeak: Ruandan, Paraguaien eta Kolonbian. Guztira, 69.300 euroko diru laguntza jaso du erakundeak.
Ruandan, Fukwe, Munoga eta Ngamba herrien arteko errepidean zubi bat eraikiko dute. 2007. urtean eraiki zuen zubia bertako komunitateak, baina azkeneko euriteak kalte larriak eragin ditu bertan. Zubi horrek 17.400 pertsona elkartzen ditu, hiru herrien artean, eta puntu garrantzitsua da eskualdeko merkataritzarentzat. 15.300 euroko gastua izango da zubikoa, eta aurreikusten dutenez, bi hilabetetan osatuko dute.
Ruandan ere, Kabuga herrian etxebizitza duinak eraikitzeko proiektua aurkeztu du Behar Bidasoak. Lau etxebizitza eraikiko dituzte, diru laguntzarekin erositako lur batean. Etorkizunean hamabi etxebizitza eraikitzeko proposamena mahaigaineratu du Behar Bidasoak, horrela, bertan komunitatea eta zerbitzu sare bat sortzeko helburuarekin. Etxebizitzetan 34.000 euro inbertituko dituzte.
Alfabetizazio prozesua
Paraguaien, 20 familia laguntzeko proiektua garatu dute. Abai herriko ur hornidura sistema hobetzeko inbertsioa egingo dute, eta horrez gain, zentro komunitarioa indartuko dute. Familien egoera hobetzea dute helburu, haiei ere laguntza zuzena emanez, hala nola haien baratzak hobetuz. Kolonbiako Pereira hirian emakumeen hezkuntzan murgilduko da gobernuz kanpoko erakundea. “Hezkuntza arauturako sarbiderik ez duten emakumeentzako lan- eta enpresa-gaikuntza emango da, haien autonomia ekonomiko eta sozialari lagunduz. Gainera, helduentzako alfabetatze-ikastaroa egiteko aukera mantentzen da, batez ere emakume indigenentzat, prestakuntza-tailerretarako sarbidea erraztuz eta gizarteratzeko aukerak zabalduz”. Azken bi proiektu horietako bakoitzean 10.000 eurorekin lagunduko du Behar Bidasoak.
