Bidasoa Institutuko hartzaile geodesikoa berritu du aldundiak
Gipuzkoako GNSS sarearen hogeigarren urteurrenarekin batera dator aldaketa hau. Segundoero, Irungo Bida estaziotik 30 satelite baino gehiagoren datuak ikus daitezke.
Mugikortasuneko, Turismoko eta Lurralde Antolaketako departamentuak Irungo Bidasoa Institutuko hartzaile geodesikoa berritu du. Institutuan izan berri da Azahara Dominguez diputatua. Jakinarazi duenez, aurrekoa zaharkituta zegoelako berritu dute, eta hain zuzen, Gipuzkoako GNSS sarearen hogeigarren urteurrenarekin batera dator aldaketa hau.
198oko hamarkadan sortu zen Gipuzkoako azpiegitura geodesikoa, “lurraldeari doitasun handiko erreferentzia topografikoak emateko” asmoz, Dominguezen arabera. Azpiegitura horren zati bat aipatutako GNSS sare hori da, doitasunezko lan topografikoetarako GNSS sateliteen behaketen zuzenketak “doan eta denbora errealean” ematen dituena.
Irunen aurki daitekeen estazioak Bida izena du, eta 2009tik aldundiarekin lanean dihardu. Estazioa beti dago martxan eta eguneratuta, ikasleentzat eta Gipuzkoako GNSS sareko erabiltzaileentzat.
Orain arte, Irungo zentroko hartzaileak GPS satelite estatubatuarren eta Glonass errusiarraren konstelazioen seinaleak kudeatzen zituen, baina horrez gain, baita Galileo eta Beidu seinaleak ere. Horrek zerbitzuaren murrizketa eragiten zuen, aldundiaren arabera, “informazio osatugabea” eskaintzen ari baitzen. Hartzaile berriarekin egoera hori konpondu dela dio Dominguezek, “lan topografikoak asko erraztuz, erabiltzaileek eskura dituzten sateliteen kopurua bikoizten baitu”.
Baina, zer da hartzaile geodesiko bat? Geodesiak edozein puntuk lurrazalean duen posizioa zehatz-mehatz ezagutzeko aukera ematen du, eta horrek kartografia ofizialerako, nabigazio sistemetarako, geologia azterketetarako eta arrisku naturaletarako “berebiziko garrantzia” dute, diputatuaren esanetan. Segundoero, Irungo Bida estaziotik 30 satelite baino gehiagoren datuak ikus daitezke. Datu guztiak prozesatu eta erabiltzaileek zuzenean jasotzen dituzte, denbora errealean koordenatuak zehaztasun handiz lortzeko.
Dominguezek azpiegitura geodesikoen garrantzia nabarmendu du, “funtsezkoak” direla esanez “profesionalek topografiarako, udal kartografiarako, ingeniaritzarako edo itsas mailako ikasketetarako”.
