Herrian izandako eraso matxista irmoki gaitzetsi dute talde guztiek
Herrian berriki gertatutako indarkeria matxista kasu baten kontrako adierazpen instituzionala kaleratu dute Abotsanitz, EAJ, PSE-EE eta EH Bildu taldeek.
Gaur goizean egin dute elkarretaratzea Martxoak 8 plazan. Hondarribiko Udalean ordezkaritza duten talde guztiek (Abotsanitz, EAJ, PSE-EE eta EH Bildu) adierazpen instituzional bateratua kaleratu dute gaur, herrian izan berri den indarkeria matxista kasu bat dela eta. “Gaitzespen gogorrena” adierazi du erakundeak lau taldeen izenean eta laguntza eta elkartasun osoa adierazi diete erasoa jasan duen emakumeari eta haren ingurukoei.
Gertaeraren berri izan duen bezain pronto, erosoari buruzko informazioa “egiaztatu, erkatu eta zabaldu” ondoren, protokolo instituzionala aktibatu du erakundeak, “informazioa baloratzeko eta beharrezko pausuak emateko”. Bada, informazio hori baloratu ondoren, honako erabakiak hartu ditu erakundeak: alde batetik, udalaren “jarrera irmo” adieraztea, “argi eta garbi esateko ez ditugula inola ere onartzen emakumeen eskubideak urratzen dituzten eraso hauek”; eta, bestetik, herritar guztiei eskatzea “gaitzespen argi bat agertu dezaten emakumeen aurkako indarkeriaren aurka, indarkeria ez baita pairatzen duten emakumeen arazoa, baizik guztiena”.
Adierazpen honetan aipatzen dutenez, indarkeria matxistak “arazo sakon bat” dauka jatorrian, “emakumeak kontrolpean eta mendean izan nahi dituen ideologia”. Indarkeria hori ez dela ekintza bakartuen edota azalpenik gabeko gertakarien emaitza dio erakundeak: “generoen gaineko aurreiritziak, gizartean aski errotuta dauden horiek dira, hain zuzen, halako ondorio larri eta tamalgarrien sortzaile. Emakumeak desberdintasun eta menpekotasun materialeko egoera batera, bizitza prekario batera behartzen ditu gizartearen antolamenduak. Ez ditu herritar osotzat hartzen, gizonezkoen maila berean, eta ez die aukerarik ematen oinarrizko eskubideen jabe izateko”.
Udalak pertsona guztien eskubideak bermatzeko ardura osoa duela erantsi dute adierazpen honetan, eta hortaz, ez duela atsedenik hartuko ahalegin horretan, “gure bizikidetza demokratikoaren oinarriak auzitan jartzen dituen arazo sozial larri honen irtenbidea bilatu beharra baitago guztion artean. Langintza horren barruan, ezinbestekoa da adierazpide egokiak eskaintzea Hondarribiko herritarrei, oro har, emakumeen aurkako eraso guztiak irmotasunez gaitzetsi ditzaten”.
