Urrezko intsignia nork eramango duen aukeratzeko azken egunak
Ostegunean itxiko dute bozkatzeko aukera. Alberto Lasa, Maria Jesus Berrotaran eta Sorotan Beleren artean bozkatu behar da.
Hondarribiarrak adi egon daitezela, osteguna (hilak 21) baita urrezko intsignia nork eramango duen bozkatzeko azken eguna. Lotura honen bidez eman beharko da botoa, hiru hautagairen artean aukeratu beharko dute herritarrek.
Lehen hautagaia Alberto Lasa Ansalas da, “herrigintzan lan handia egindakoa”. 1991tik Parrokiko Abesbatzako zuzendari izan da, eta 1992tik Txistularien Alardeko zuzendari ere izan da. Surbesta Abesbatzako zuzendari izandakoa da, eta azken urteetan Herri Kanta Jaialdian Goxoki Abesbatzako zuzendari da. Gainera, 80. hamarkada bukaeran Jaiotza Biziduna ekitaldia antolatzeari ekin zion.
Bigarren hautagaia Maria Jesus Berrotaran Etxeberria da, Hondarribiko lehen emakume udaltzaina. Emeki Emakume Elkartearen sorreran parte hartu zuen, eta Hondarribiko lehen mazolari ere izan zen. “Herrigintzan etengabeko lanean, emakumearen berdintasuna lortzeko ekimen guztietan aktiboki lanean dabil urte askoan”.
Urrezko intsignia eramateko azken hautagaia Sorotan Bele taldea da, “pasa den mendeko 90. hamarkadan sortu zen herriko musika talde esanguratsuenetako bat”. Taldearen doinuek “herriaren batasuna” lortu zuten, baita “Hondarribiaren izena edonon zabaltzea ere”. Gainera, sorreran taldean zeuden zenbait musikari Sorotan Bele gogoan izeneko kontzertuak ematen ari dira, adibidez, Gorka Sarriegi eta Urbil Artola.
